जीवनावश्यक साहित्य आगीमध्ये जळून खाक

हिर्डोशी, ता.३ : चिखलगाव धोंडेवाडी (ता.भोर) येथील ज्येष्ठ महिला हरुबाई राजाराम आंबवले यांच्या घरास अचानक आग लागली. या आगीत मोठे नुकसान झाले. ही घटना बुधवारी (ता.२) सायंकाळी घडली. घराच्या छपरावरील वासे, कौले यांसह घरातील धान्य, कपडे, भांडी अशा जीवनावश्यक साहित्यांचे जळून नुकसान झाले.

आगीचे कारण अद्याप समजू शकले नाही. घरात एकट्याच राहत असलेल्या आंबवले या भात लावणीसाठी शेतात गेल्या होत्या‌. त्यांच्या घरातून धूर निघत असल्याचे दिसल्यावर ग्रामस्थांनी घटनास्थळी धाव घेतली. परंतु पावसातही आगीने रौद्ररूप धारण केल्याने घराचे मोठे नुकसान झाले. असल्याचे ग्रामस्थांनी सांगितले. दरम्यान, ग्रामस्थांनी महावितरणचा वीजपुरवठा बंद करून आग आटोक्यात आणण्यासाठी प्रयत्न केले. भोर नगरपालिकेचा अग्निशामक विभागाने आग आटोक्यात आणली.
02118