हिर्डोशीतील प्रवाशांची एसटीअभावी गैरसोय

हिर्डोशी, ता. ९ : भोर- महाड रस्त्याच्या रुंदीकरणाच्या कामामुळे हिर्डोशी (ता. भोर) परिसरात मोठ्या प्रमाणात रस्त्याचे खोदकाम झाले असल्याने सुरक्षिततेसाठी या मार्गावरील सुरू असलेली एकमेव महाराष्ट्र राज्य परिवहन मंडळाची शिळींब ही मुक्कामी एसटी बस मे महिन्यांपासून बंद केली आहे. त्यामुळे प्रवासी आणि विद्यार्थ्यांची गैरसोय होत आहे.
कोरोनातील जिल्हा बंदी, पडझड, दुरुस्ती, अतिवृष्टी, रस्ता खचणे, दरड कोसळणे अशा कारणांमुळे सन २०१८ पासून प्रशासनाकडून वारंवार वरंधा घाट रस्ता वाहतुकीस बंद केला जात आहे. गेल्या वर्षी १९ जूनला वरंधा घाटात दरड कोसळून रस्ता तुटला होता. परंतु त्याआधीपासून कोकणात जाणारी एसटी सेवा बंद आहे. तर मे महिन्यामध्ये पावसाला सुरुवात झाल्यापासून हिर्डोशी परिसरातील गावांसाठी एकमेव असणारी शिळींब मुक्कामी एसटी बंद आहे. त्यामुळे देवघर, वेणुपुरी, कोंढरी, हिर्डोशी, कारुंगण, वारवंड, शिरगाव, आशिंपी, उंबर्डे, शिळींब, अभेपुरी, दुर्गाडी, चौधरीवाडी येथील नागरिकांची बाजारहाट, दवाखाना, शासकीय कामे, शेतीचे साहित्य आदींसाठी, तसेच विद्यार्थ्यांच्या शिक्षणाची गैरसोय होत आहे. अनियमित व कमतरता असलेल्या खासगी वाहनांमधून प्रवास करताना धोका पत्करून महिला, विद्यार्थी व प्रोढांबरोबर सर्वसामान्यांना आर्थिक भुर्दंड सोसावा लागत आहे.
प्रवासी वाहनांची सोय नसल्याने शालेय विद्यार्थ्यांचे नुकसान होऊ नये यासाठी काही पालकांनी मुलांच्या शिक्षणासाठी भोर शहरात भाडेतत्त्वावर खोली घेऊन कुटुंबातील एखाद्या व्यक्तीसह मुलांना स्थलांतर झाल्याचे पाहायला मिळत आहे.

एसटी बंद, खासगी वाहनांची कमतरता यामुळे मुलांना वेळेवर शाळेत जाता येत नाही. हिर्डोशी हायस्कूल येथे जाताना चिखल व भर पावसात मुलांना पायपीट करावी लागत आहे. भोर येथे कॉलेजला जाणाऱ्या मुलांची मोठी गैरसोय झाली आहे. तरी प्रशासनाकडून मुलांच्या शिक्षणासाठी एखादी मिनीबस सुरू करावी.
- संदीप धामुनसे, ग्रामस्थ, हिर्डोशी

हिर्डोशी भागात रस्त्याचे काम सुरू असल्याने रस्ता अरुंद व चिखल, मातीचा, तसेच धोकादायक झाला आहे. शिळींब मुक्कामी बसमध्ये नेहमीच प्रवासी संख्या जास्त असते. सध्या रस्ता धोकादायक असल्याने सुरक्षिततेसाठी बस बंद केली असून, रस्ता सुस्थितीत झाल्यावर या मार्गावरील बस सुरू केल्या जातील.
- रमेश मंता, शाखा व्यवस्थापक, भोर आगार