करंजे येथील आदिवासींना हक्काचे घरकुल

हिर्डोशी, ता. १० : करंजे (ता. भोर) येथील प्रधानमंत्री जनमन आवास घरकुल योजनेअंतर्गत आदिम आदिवासी कातकरी कुटुंबासाठी बांधण्यात आलेल्या घरकुल संकुल प्रकल्पाचे उद्‍घाटन जिल्हा परिषदेचे मुख्य कार्यकारी अधिकारी गजानन पाटील यांचे हस्ते बुधवारी (ता. ९) करण्यात आले.
घरकुल पूर्ण झालेल्या शीतल दीपक मुकणे, विश्वास किसन पवार, दादू सुभाष घोगरेकर, गंगाराम शंकर पवार, सोनबा बळीराम मुकणे, सुनील बळिराम मुकणे . सहा लाभार्थींच्या घरकुलांचा गृहप्रवेश मान्यवरांच्या उपस्थितीत करण्यात आला. यावेळी भोरचे गटविकास अधिकारी किरणकुमार धनवाडे, सहाय्यक गटविकास अधिकारी उदय जाधव, विस्तार अधिकारी माणिक घोगरे, शाखा अभियंता पद्माकर चांडके, सरपंच वैशाली योगेश कुडले, उपसरपंच संतोष चिकणे, ग्रामपंचायत सदस्य जनाबाई मांढरे, अर्जुन मुकणे, अनिल कोंढाळकर, रूपाली कुडले, प्रियांका कुडले, ग्रामपंचायत अधिकारी व्ही. जी. अनंतकर, संगणक परिचालक संतोष कुडले आदी उपस्थित होते.
यावेळी गजानन पाटील म्हणाले, ‘‘ज्यांना घरे नाहीत त्यांना शासनामार्फत प्रधानमंत्री जनमन आवास योजनेअंतर्गत घरकुल देण्याची योजना राबवत आहे. तालुक्यातील सुरु असलेल्या घरकुलांच्या केलेल्या पाहणीत चांगले काम सुरु असल्याचे दिसून आले. घरकुलांच्या जागेच्या प्रश्नांबाबत आढावा घेण्यात आला. जेथे सरकारी जागा, गायरान, गावठाण, फॉरेस्टच्या जागा असेल त्यांना प्राधान्याने देण्यासंदर्भात प्रस्ताव देण्याच्या सूचना देण्यात आल्या आहेत.’’