शिंद ग्रामस्थांकडून बाजीप्रभू देशपांडे यांना अभिवादन

महुडे, ता. १४ : वीररत्न बाजीप्रभू देशपांडे व फुलाजीप्रभू देशपांडे यांच्या ३६५ व्या पुण्यतिथीनिमित्त शिंद (ता.भोर) गावात अभिवादन कार्यक्रमाचे आयोजन करण्यात आले. पुणे जिल्हा परिषद, भोर पंचायत समिती आणि शिंद ग्रामपंचायत यांच्या वतीने रविवारी (ता. १३) हा कार्यक्रम पार पडला.
श्री वीर बाजीप्रभू प्रतिष्ठानच्या वतीने शनिवारी (ता. १२) विशाळगड, पावन‌खिंड (जि.कोल्हापूर) येथून प्राणज्योत घेऊन निघालेल्या ग्रामस्थांनी भोर चौपाटी येथील छत्रपती शिवाजी महाराज यांच्या पुतळ्यास रविवारी सकाळी पुष्पहार अर्पण केला. भोलावडे, किवत, गवडी, शिंद येथे प्राणज्योतीचे स्वागत करण्यात आले. शिंदमधील बाजीप्रभू देशपांडे यांच्या पुतळ्याला पुष्पहार अर्पण करून ग्रामपंचायत कार्यालय परिसरातील सभामंडपात वीररत्न बाजीप्रभू व फुलाजीप्रभू देशपांडे यांच्या प्रतिमांचे पूजन करण्यात आले.
जिल्हा परिषदेचे माजी सदस्य विठ्ठल आवाळे म्हणाले की, बाजीप्रभू हे आपल्या शिंद गावचे. आपल्या मातीतील असल्याने त्यांचा आपल्याला अभिमान असला पाहिजे. शिंद गाव ही ऐतिहासिक, त्यागाची व बलिदानाची भूमी आहे. तरुणांना बाजीप्रभूंची प्रेरणा मिळावी, त्यांचा आदर्श घेऊन वाटचाल करावी हा उद्देश ठेवून माजी मंत्री अनंतराव थोपटे यांच्या प्रयत्नातून शिंदमध्ये बाजीप्रभू देशपांडे यांचा पूर्णाकृती पुतळा उभारला.
सूत्रसंचालन अशोक चव्हाण, तर प्रास्ताविक सरपंच शंकर माने यांनी केले. अजय कोंढाळकर, भाई ताम्हाणे, प्रशांत देशपांडे, संजय सुळे, रूपाली देशपांडे आदी मान्यवरांनी मनोगत व्यक्त केले. दादासाहेब कोरेकर यांनी बाजीप्रभू देशपांडे यांचे जीवनचरित्र व्याख्यानातून सांगितले. सरपंच माने व उपसरपंच अमर शेडगे यांच्या हस्ते उपस्थितांचा सत्कार करण्यात आला.
यावेळी खरेदी-विक्री संघाचे उपाध्यक्ष अतुल शेडगे, दीपक दामगुडे, भरत साळुंके, दीपक कुमकर, सागर दिघे, भानुदास दुधाणे, उपसरपंच अमर शेडगे, ग्रामविकास अधिकारी महादेव सालगुडे, प्रतिष्ठानचे गौरव शेडगे, अमीर कोंढाळकर, सचिन जाधव, योगेश खुटवड, ग्रामपंचायत सदस्य, विकास सोसायटी संचालक मंडळ, पुणे व भोरमधून आलेले चांद्रसेनीय कायस्थ प्रभू समाज, शिंद पंचक्रोशीतील ग्रामस्थ उपस्थित होते. दरम्यान, राजगड ज्ञानपीठाच्या सचिव स्वरूपा थोपटे, शिवसेना ठाकरे गटाचे जिल्हाप्रमुख प्रकाश भेगडे, उपजिल्हाप्रमुख शैलेश वालगुडे यांनी भेट देऊन अभिवादन केले. शिंद ग्रामपंचायत, वीर बाजीप्रभू प्रतिष्ठान, ग्रामस्थ व गावातील तरुण मंडळांचे सहकार्य लाभले.

पाच वर्षांपासून निधी मिळेना
बाजीप्रभू देशपांडे यांच्या पुण्यतिथीनिमित्त आयोजित कार्यक्रमासाठी जिल्हा परिषदेमार्फत शिंद ग्रामपंचायतीला निधी दिला जात होता. सुरवातीला १५ हजार मिळत असलेला निधी कालांतराने २५ हजार मिळत होता. परंतु, २०२१ पासून तो बंद करण्यात आला आहे. कार्यक्रमाच्या आयोजनाचा संपूर्ण खर्च ग्रामपंचायतीकडून करण्यात येत आहे. त्यामुळे थकीत निधीसह पुढील काळात नियमित निधी मिळावा, अशी मागणी ग्रामपंचायतीकडून होत आहे.