जरांगे पाटील उद्या भोरच्या दौऱ्यावर

हिर्डोशी, ता. ७ : मराठा नेते मनोज जरांगे पाटील शनिवारी (ता. ९) भोर तालुक्याच्या दौऱ्यावर येणार असून, रायरेश्वर किल्ल्यावर अभिषेक करून भोरमध्ये समाज बांधव व कार्यकर्ते यांच्याशी ते संवाद साधणार आहेत.
भोरमध्ये मराठा समाजाच्या आरक्षण मुद्यांवर, भोर तालुक्यातील शासकीय जळीत दप्तर, रायरेश्वर विकास, स्वराज्य शपथदिन आदी विषयांवर चर्चा करण्यात येणार असून, ते समाजाच्या कार्यकर्त्यांच्या गाठीभेटी घेणार आहेत. त्यांचे शनिवारी सकाळी आठ वाजता भोर येथे आगमन होणार आहे. त्यानंतर नऊ वाजता रायरेश्वरकडे प्रस्थान होणार असून, किल्ल्यावर जाऊन तेथील शिवमंदिरात सकाळी अकरा वाजता अभिषेक करण्यात येणार आहे. एक वाजता भोरकडे परतणार असून, तीन वाजता भोर येथील यशवंत लॉन्स येथे समाज बांधवांसाठी चर्चेसाठी उपस्थित राहणार आहेत. सायंकाळी पाच वाजता पत्रकार परिषद घेण्यात येणार आहे. रात्री दहा वाजता गाठीभेटी घेण्यात येणार आहे. कोणताही राजकीय विचार न करता समाजासाठी एकत्र येण्याची विनंती करत २९ ऑगस्टला मुंबईमध्ये होणाऱ्या आंदोलनाला व जरांगे पाटील यांच्या आरक्षण लढ्याला पाठिंबा देण्यासाठी एकत्र येण्याचे आवाहन भोर तालुका सकल मराठा समाजाचे अध्यक्ष संजय भेलके यांनी केले आहे.