भोरमधील मंदिरांमध्ये शिवभक्तांसह पर्यटक

हिर्डोशी, ता. १८: भोर तालुक्यातील पांडवकालीन आंबवडे व साळव येथील श्री नागेश्वर मंदिर, तर किल्ले रायरेश्वर येथील महादेव मंदिरात श्रावणी शेवटच्या सोमवारनिमित्त भाविकांनी दर्शनासाठी गर्दी केली.
रायरेश्वर येथील शिव मंदिरात छत्रपती शिवाजी महाराजांनी हिंदवी स्वराज्य स्थापनेची शपथ घेतली. त्यामुळे या पवित्र मंदिरात पुण्यासह भोर व वाई (जि. सातारा) तालुक्यातील शिवभक्त व पर्यटक यांनी गर्दी केली. रायरेश्वर येथील निसर्गरम्य वातावरण, धबधबे तसेच पठारावर असलेली विविध रंगांची फुले व हिरवळ यामुळे पर्यटक रायरेश्वरावर येण्यास पर्यटक पसंती देतात. तर भोर तालुक्यातील पांडवकालीन असलेल्या आंबवडे व साळव येथील श्री नागेश्वर मंदिरात श्रावण महिन्यातील चौथ्या सोमवार निमित्त पूजा, अभिषेक, आरतीसह दर्शनासाठी भाविकांनी गर्दी केली. आंबवडे येथील झुलता पूल पर्यटकांना आकर्षित करत आहे.