हिरडस मावळात बांबू पिकाचे नुकसान

हिर्डोशी ता. १९ : भोर तालुक्यातील पश्चिम डोंगराळ हिरडस मावळात सोमवारी (ता. १८) रात्रीपासूनच जोराच्या वाऱ्यासह मुसळधार पाऊस पडत आहे. त्यामुळे या भागातील नागरिकांचे जीवनमान विस्कळित झाले आहे. जोराच्या वाऱ्यांमुळे शेतकऱ्यांचे प्रमुख पीक असलेल्या बांबू पिकाचे नुकसान झाले आहे. बांबूचे नविन आलेले कोंब जोराच्या वाऱ्यामुळे तुटून पडल्याचे हिर्डोशीचे हरिभाऊ नाईलकर यांनी सांगितले. तर भोर महाड रस्त्याच्या रुंदीकरणाचे काम सुरु असून जागोजागी रस्त्याचे खोदकाम केलेले आहे. त्यामुळे हिर्डोशी, वारवंड, शिरगाव, कोंढरी, वेणूपुरी परिसरात रस्त्यावर जागोजागी पाणी साचून राहात आहे. त्यामुळे वाहचालकांना कसरत करत पाण्यातूनच वाहने चालवावी लागत असल्याचे शिरगावचे अक्षय धुमाळ यांनी सांगितले.
संततधार पावसामुळे नीरा देवघर धरण मंगळवारी सायंकाळी सात वाजता ९९ टक्के भरले असून, धरणात येणाऱ्या येव्याचे प्रमाण वाढल्याने धरणाच्या सांडव्यातून सुरु असलेल्या पाण्याच्या विसर्गात वाढ करून सायंकाळी सात वाजता १२ हजार ३७५ क्युसेक केला. येव्याचे प्रमाण वाढत असल्याने पुन्हा रात्री आठ वाजता विसर्गात वाढ करून १४ हजार ६७८ क्युसेक केला आहे.