शिळिंबमधील शिबिरात ८० जणांची तपासणी

हिर्डोशी, ता.३१: शिळिंब (ता.भोर) येथे सामाजिक बांधिलकी प्रतिष्ठानतर्फे शनिवारी (ता.३०) झालेल्या मोफत आरोग्य तपासणी शिबिरात शिळिंब, कुंड व राजीवडी या गावातील ८० जणांनी आरोग्य सेवेचा लाभ घेतला.
शिबिरामध्ये रक्तदाब, रक्तशर्करा, ईसीजी, इत्यादी तपासण्या करण्यात आल्या. तसेच पावसाळ्यातील साथीच्या आजारांवर मोफत उपचार करण्यात आले. रोटरी क्लब भोरचे माजी अध्यक्ष डॉ.आनंदा कंक यांनी रुग्ण तपासणी केली. यावेळी प्रतिष्ठानचे अध्यक्ष शरद बांदल, सचिव दीपक पारठे, मारुती डेरे, रमेश डेरे, दत्ता डेरे, हनुमान डेरे, लक्ष्मण डेरे, अरुण राजीवडे, सुरेश बांदल, शिवराम बांदल आदी उपस्थित होते. हिर्डोशीमार्गे एकमेव सुरू असलेली शिळिंब मुक्कामी एसटी बस मे महिन्यांपासून बंद आहे. तर पांगारी मार्गे एसटी बस सुरू असून ते अंतर जास्तीचे असल्याने दवाखान्यात अथवा इतर कामांसाठी भोरला गेल्यास अख्खा दिवस मोडावा लागत आहे. यामुळे येथील नागरिकांची दळणवळणाची गैरसोय होत आहे. सध्याच्या वातावरणातील बदलामुळे साथीचा आजारांपासून बचाव करण्यासाठी हे शिबिर घेतल्याचे शिळिंबच्या सरपंच हीना डेरे यांनी सांगितले.