वेळवंड खोऱ्यातून एक घास माणुसकीचा

महुडे,ता २: भोर तालुक्यातील ३२ गाव वेळवंड खोऱ्यातून मुंबई येथील मराठा आंदोलकांना हजारो भाकरी, कोरडा शिधा, फरसाण, पाणी बाटल्या, फळे, शेंगदाणा चटणी अशी शिदोरी मंगळवारी (ता.२) टेंपोतून पाठविण्यात आली. एक घर एक शिदोरी, एक घास माणुसकीचा, एक हात मदतीचा या मोहिमेला साथ देत वेळवंड खोऱ्यातील अनेक गावांनी सहभाग घेतला. म्हाळवडी येथून सकाळी नऊ या मोहिमेला सुरवात करण्यात आली. त्यात प्रामुख्याने म्हाळवडी, बारे बुद्रूक,बारे खुर्द , बसापुर या पंचक्रोशीतील गावांतील महिलांनी सकाळी पहाटे उठून हजारो भाकरीचे योगदान दिले. तसेच डेहन, पांगरी, वेळवंड, राजघर, भोलावडे, गवडी, शिंद, किवत आदी गावांमधून सोशल मीडियावरील आवाहनाला प्रतिसाद देत शिदोरी पोहोचवण्यात आली. दुपारी दोन वाजता आंदोलन स्थळी ही शिदोरी पोहोच करण्यात आली असल्याची माहिती राजेश बोडके यांनी सांगितले. आंबवडे खोऱ्यातील करंजे, सांगवी भिडे, नाटंबी, टिटेघर या गावातील महिलांनी सकाळी भाकरी, ठेचा व चटणी बनवून दिली. हा शिधा मुंबईकडे पाठवण्यात आला असल्याचे नितीन कुडले,अक्षय झुणगारे, गणेश घोलप, सचिन नवघणे यांनी सांगितले.