कालव्यात बुडून तरुणाचा मृत्यू

हिर्डोशी (ता. ५) : कर्नावड (ता. भोर) येथील कुडपणेवाडीत कालव्यात पडलेल्या वासराला वाचवण्यासाठी कालव्यात उडी मारलेल्या ओंकार (बाबू) शंकर कुडपणे (वय २१) या तरुणाचा मृत्यू झाल्याची घटना शुक्रवारी (ता. ५) दुपारच्या वेळी घडली. याबाबत दत्तात्रेय कुडपणे यांनी भोर पोलिस ठाण्यात खबर दिली आहे. स्थानिकांनी दिलेल्या‌ माहितीनुसार, येथील ओंकार गाय आणि वासरू चारण्यासाठी कालव्याशेजारून जात असताना वासरू पाय घसरून कालव्यात पडले. वासराला वाचवण्यासाठी त्याने पाण्यात उडी मारली. मात्र, पाण्याच्या प्रवाहाचा वेग जास्त असल्याने ओंकार वाहत गेला. यात त्याचा बुडून मृत्यू झाला. दरम्यान, काही अंतरावर वासरू वाहून जात असल्याचे एका शेतकऱ्याने पाहिल्याने पळत जाऊन वासराला पाण्याबाहेर काढले. मात्र, वाहत्या पाण्यात ओंकारला पाण्यातून बाहेर निघता आले नाही. स्थानिक नागरिक, तरुणांनी काही वेळाने तरुणाचा मृतदेह कालव्यातून बाहेर काढला. पोलिस हवालदार सुशांत पिसाळ पुढील तपास करीत आहेत.

02444