बिबट्याच्या हल्ल्यात शिळिंबमध्ये बैल ठार

हिर्डोशी : शिळिंब (ता.भोर) या हिरडस मावळातील दुर्गम, डोंगराळ असलेल्या गावातील शेतकरी मुक्ताराम गणपत डेरे यांच्या चरायला सोडलेल्या बैलावर बिबट्याने हल्ला केल्याने बैलाचा मृत्यू झाला आहे. ही घटना शुक्रवारी (ता .१०) सकाळी दहा ते दुपारी दोनच्या दरम्यान घडली आहे. डेरे यांनी सकाळी नऊ वाजता गावच्या हद्दीतील भोम्याची पाटी परिसरात दहाबारा गुरे चरायला सोडली होती. दुपारी तीन वाजता रानात सोडलेली गुरे पाहण्यासाठी डेरे गेले असता त्यांना बैल झाडाझुडपांत मृत अवस्थेत आढळून आला. यावेळी शेतकरी डेरे यांच्यासह पोलिस पाटील हनुमंत डेरे व जिजाबाई डेरे घटनास्थळी उपस्थित होते. बिबट्याने हल्ला केल्याची खात्री झाल्यावर त्यांनी माजी सरपंच मारुती डेरे यांना फोन द्वारे कळवले. यात शेतकऱ्यांचे तीस हजार रुपयांपेक्षा अधिक नुकसान झाले आहे. वन विभागास घटनेविषयी माहिती दिली असून नुकसानभरपाई मिळण्याची मागणी सरपंच हीना डेरे व ग्रामस्थांनी केली आहे. तर हिर्डोशी वनपरिमंडल अधिकारी रोहन इंगवले यांनी पंचनामा करून नुकसानभरपाई देण्याची प्रक्रिया केली जाईल, असे सांगितले.