बारे म्हाळवडी विद्यालयास कपाटासह पुस्तके भेट

महुडे, ता. २८ : बारे बुद्रुक (ता. भोर) येथील भोर एज्युकेशन सोसायटीच्या बारे म्हाळवडी माध्यमिक विद्यालयात रोटरी क्लब ऑफ पुणे बाणेर यांच्या वतीने विद्यार्थ्यांमध्ये वाचनाची आवड निर्माण करणे, वाचनसंस्कृती रुजवणे या उद्देशाने रोटरीचे वाचनालय या उपक्रमांतर्गत शाळेला लाकडी कपाटासह विविध प्रकारची २०० पुस्तके भेट देण्यात आली.
भेट दिलेल्या पुस्तकात आत्मचरित्र, कथा, कादंबरी, शैक्षणिक, लोक साहित्य, प्रेरणादायी लेखन, आरोग्य, कविता आदी पुस्तकांचा समावेश आहे. यावेळी सत्यनारायण काबरा, कमलेश फेरवाणी, विलास शेटे, मयुरी सोमवंशी, डॉ. साहेब खंदारे, मुख्याध्यापिका मंजूषा भागवत, बजरंग सापे, कल्पना शिंदे, विजय दानवले व विद्यार्थी उपस्थित होते.
डॉ. सुनिता धर्मराव यांनी विद्यार्थ्यांना वाचन संस्कृतीचे महत्त्व सांगताना वाचनाचे फायदे सांगितले. तसेच विद्यार्थ्यांसाठी राबविण्यात आलेल्या रोटरी क्लब ऑफ पुणे डायमंड यांच्या ग्रीन प्रोजेक्टबाबत मार्गदर्शन केले. तर सत्यनारायण काबरा यांनी विद्यार्थ्यांशी संवाद साधत मार्गदर्शन केले. इ-लर्निंग प्रोजेक्टसाठी आर्थिक साहाय्य करून स्मार्ट टीव्ही देण्यात येणार असल्याचे सांगितले.