आपटीतील विद्यार्थ्यांचा जुलाबामुळे मृत्यू

हिर्डोशी, ता. २१ : आपटी (ता. भोर) येथील आध्यात्मिक वारकरी शिक्षण संस्थेतील १३ वर्षीय विद्यार्थ्यांचा जुलाबाने मृत्यू झाल्याची घटना गुरुवारी (ता. १९) रोजी घडली. शुभम सखाराम गोगावले असे मृत्यू झालेल्या मुलाचे नाव आहे. याबाबत मुलाचे वडील सखाराम गोविंद गोगावले (रा. कामथे ता. पोलादपूर, जि.रायगड. सध्या रा. वाई) यांनी भोर पोलिस ठाण्यात माहिती दिली आहे. याबाबत अकस्मात मृत्यूची नोंद करण्यात आली आहे.
गोगावले यांची सोहम (वय १५) व शुभम ही दोन्ही मुले आपटी येथील वारकरी शिक्षण संस्थेत राहण्यास असून आपटी जिल्हा परिषद शाळेत शिक्षण घेत आहेत. शुभम याला बुधवारी रात्री जुलाब झाल्याचे संस्थेकडून कळताच गुरुवारी सकाळी त्याचे आई-वडील आपटीत त्याला पाहण्यास आले. शुभमला भेटल्यावर त्याने जुलाब होत असल्याचे सांगितले. आई त्याला भात खाऊ घालत असताना त्याला चक्कर आली. त्याने डोळे फिरवले. उपचारासाठी भोरमधील उपजिल्हा रुग्णालयात आणले असता उपचारापूर्वीच मृत्यू झाल्याचे तेथील डॉक्टरांनी सांगितले. शवविच्छेदन करण्यात आले असून भोर पोलिस पुढील तपास करीत आहेत.