नारायणगाव सोसायटीतर्फे शेतकऱ्यांना नऊ कोटींचे कर्ज

नारायणगाव, ता. १३ : ‘‘नारायणगाव विविध कार्यकारी सेवा सहकारी सोसायटीच्या वतीने शेतकऱ्यांना खरीप हंगामातील पीक कर्ज वाटपाचा प्रारंभ शुक्रवारपासून (ता.११) करण्यात आले. पहिल्याच दिवशी पुणे जिल्हा बँकेच्या वतीने सोसायटीच्या ८५० सभासद शेतकऱ्यांना नऊ कोटी रुपयांचे पीक कर्ज वाटप केले आहे,’’ अशी माहिती सोसायटीचे अध्यक्ष संतोष खैरे यांनी दिली.
नारायणगाव सोसायटीच्या वतीने शेतकऱ्यांना खरीप हंगामातील पीक कर्ज वाटपाचा प्रारंभ सोसायटीचे अध्यक्ष संतोष खैरे, उपसरपंच योगेश पाटे, जिल्हा बँकेचे विकास अधिकारी प्रसाद कोल्हे, नारायणगाव शाखेच्या व्यवस्थापिका जयमाला काळे, दादाभाऊ खैरे, संजय खैरे यांच्या प्रमुख उपस्थितीत झाला. यावेळी उपाध्यक्ष किरण वाजगे, संचालक सीताराम खेबडे, राजेंद्र पाटे, कैलास डेरे, सीमा खैरे, रामदास तोडकरी, अरुण कोल्हे, चंद्रकांत बनकर, सचिव गणेश गाडेकर, विकास तोडकरी आदी मान्यवर व सभासद शेतकरी उपस्थित होते.

सोसायटीचे अध्यक्ष खैरे म्हणाले की, नारायणगाव ही तालुक्यातील मोठी सोसायटी आहे. सोसायटीच्या वतीने सुमारे ३२ कोटी रुपयांचे कर्ज वाटप सभासद शेतकऱ्यांना केले होते. यापैकी ३१ मार्चअखेर सुमारे बारा कोटी रुपयांची पीक कर्जाची वसुली झाली.

व्यवस्थापिका काळे म्हणाल्या की, जिल्हा बँकेच्या नारायणगाव शाखेच्या अंतर्गत सहा सोसायट्या येतात. जास्त कर्ज पुरवठा करणारी नारायणगावची सोसायटी मोठी असून, शेतकऱ्यांच्या मागणीनुसार जिल्हा बँकेचे संचालक संजय काळे यांच्या मार्गदर्शनाखाली खरीप हंगामासाठी पीक कर्ज वाटप सुरू केले आहे.

केंद्र शासनाच्या वतीने बहुउद्देशीय इमारत बांधकामासाठी नारायणगाव सोसायटीला निधी उपलब्ध झाला आहे. पाच मजली इमारतीचे बांधकाम सुरू असून पुढील सहा महिन्यात सुमारे तीन कोटी खर्च करून सोसायटीची बहुउद्देशीय इमारतीचे काम पूर्ण केले जाईल. यामुळे पुढील काळात सोसायटीच्या उत्पन्न वाढीस चालना मिळणार आहे.
- संतोष खैरे, अध्यक्ष : नारायणगाव सोसायटी

06471