जयहिंद अभियांत्रिकी महाविद्यालयात ड्रोन कार्यशाळा

नारायणगाव, ता. ९ : कुरण येथील जयहिंद अभियांत्रिकी महाविद्यालयातील इलेक्ट्रॉनिक अँड टेलिकम्युनिकेशन या अभियांत्रिकी शाखेतील विद्यार्थ्यांसाठी जटायू कंपनीच्यावतीने ड्रोन बनवणे या तीन दिवसीय कार्यशाळेचे आयोजन केले होते.
जटायू कंपनीचे वरिष्ठ ड्रोन मार्गदर्शक निखिल पतंगे, प्रशांत धेंड या तज्ञांनी भावी अभियंत्यांना मार्गदर्शन केले. कार्यशाळेचे उद्‍घाटन जयहिंद शिक्षण संस्थेचे अध्यक्ष जितेंद्र गुंजाळ यांनी केले. यावेळी संचालिका डॉ. शुभांगी गुंजाळ, मुख्य कार्यकारी अधिकारी डॉ. डी. एस गल्हे, प्राचार्य डॉ. डी. जे. गरकल, शैक्षणिक समन्वयक डॉ. व्ही. एम. धेडे आदी उपस्थित होते.
याप्रसंगी ६० विद्यार्थी सहभागी झाले होते. विद्यार्थ्यांना तीन टप्प्यात मार्गदर्शन केले. पहिल्या टप्प्यामध्ये ड्रोन विषयीची मूलभूत माहिती व आवश्यक साधनसामुग्री, ड्रोन तयार करणे याबाबत अवगत केले. दुसऱ्या टप्प्यामध्ये ड्रोन उडवणे व त्यासाठी लागणारे प्रोग्रॅमिंग आदीबाबत प्रशिक्षण देण्यात आले. तिसऱ्या टप्प्यांमध्ये ड्रोन स्पर्धेचे आयोजन केले होते. प्रश्नमंजूषा स्पर्धेचे आयोजन करून कार्यशाळेचा समारोप केला. या स्पर्धेत दिशा गाढवे, तेजश्री पोखरकर, सानिका दुर्गुडे या विद्यार्थ्यांनी उल्लेखनीय यश मिळवल्याबद्दल त्यांना प्रमाणपत्र देऊन सन्मानित केले. ‘‘या कार्यशाळेमुळे विद्यार्थ्यांची संशोधन वृत्ती वाढण्यास मदत झाली असून त्यांच्या मध्ये आत्मविश्वास निर्माण झाला आहे. उद्योग जगातील संवाद साधण्याची, नवीन तंत्रज्ञान आणि उद्योग जगातील आव्हाने समजून घेण्याची, नावीन्यपूर्ण उपाय शोधण्याची संधी मिळाली आहे.’’ असे मत यावेळी प्राचार्य डॉ. गरकल यांनी व्यक्त केले.
इलेक्ट्रॉनिक अँड टेलिकम्युनिकेशन विभागाचे विभाग प्रमुख डॉ. आर. एम. मुळजकर, समन्वयक प्राध्यापक ए. एस. भोर यांनी नियोजन केले.