आदिवासी शिक्षण संस्थेतर्फे गरजूंना मोफत प्रवेश

नारायणगाव, ता. १९ : आदिवासी शिक्षण संस्था संचलित जुन्नर, आंबेगाव, खेड तालुक्यातील वसतीगृह, माध्यमिक शाळा आणि आश्रम शाळेत संस्थेच्या वतीने पहिली ते बारावी इयत्तेत शिक्षण घेत असलेल्या विद्यार्थ्यांना मोफत प्रवेश देण्यात येणार असून या विद्यार्थ्यांचा निवास, जेवण आदि खर्च संस्थेच्या वतीने करण्यात येणार आहे. यामुळे आर्थिक परिस्थिती अभावी गरीब, गरजू विद्यार्थी शिक्षणापासून वंचित राहणार नाहीत. अशी माहिती संस्थेचे सचिव देवराम मुंढे यांनी दिली.
मुंढे म्हणाले, दिवंगत माजी आमदार कृष्णराव मुंढे यांनी आदिवासी शिक्षण संस्थेच्या माध्यमातून जुन्नर, आंबेगाव, खेड तालुक्यातील दुर्गम भागात माध्यमिक शाळा वसतीगृह व आश्रम शाळा सुरू केल्या. यामागे गरीब विद्यार्थ्यांना शिक्षण मिळावे हा हेतू होता. हीच परंपरा पुढे ठेवून आदिवासी शिक्षण संस्थेच्या वतीने संस्थांतर्गत माध्यमिक विद्यालयात आणि कनिष्ठ महाविद्यालयात विद्यार्थ्यांना मोफत प्रवेश देण्यात येणार आहे. तसेच गरजू विद्यार्थ्यांची निवास, जेवणाची मोफत व्यवस्था संस्थेच्या अहिल्यामाता कन्या छात्रालय जुन्नर, महात्मा फुले विद्यार्थी वसतिगृह जुन्नर, भाऊसाहेब राऊत विद्यार्थी वसतिगृह जुन्नर, हटकेश्‍वर विद्यार्थी वसतिगृह राजगुरुनगर, शिवशंकर विद्यार्थी वसतिगृह घोडेगाव, सह्याद्री सेवा वसतिगृह घोडेगाव, आनंद छात्र निवास फुलवडे या सात वसतीगृहात करण्यात येणार आहे. प्रवेश, नाव नोंदणी आणि अधिक माहितीसाठी ८८३०३२११२१, ९३७३९८८२०५, ९११२०९५८०३ या क्रमांकावर संपर्क साधावा असे आवाहन संस्थेच्या वतीने केले आहे.