फुलझाडांच्या जागी काटेरी झाडे

नारायणगाव, ता. १ : नारायणगाव (ता. जुन्नर) येथील पुणे- नाशिक महामार्गावरील बाह्यवळण रस्त्याच्या मधोमध व कडेला बाभूळ या काटेरी वृक्षांची वाढ झाली आहे. त्यामुळे अपघाताचा धोका वाढला आहे. राष्ट्रीय महामार्ग विभागाने बाह्यवळण रस्त्याच्या दुभाजकामध्ये वाढ झालेले व अपघाताला निमंत्रण ठरणारे काटेरी वृक्ष काढून टाकावेत, अशी मागणी स्थानिक ग्रामस्थ व वाहन चालकांनी केली आहे.
नारायणगाव येथील पुणे- नाशिक महामार्गाला तीन वर्षांपूर्वी सुमारे पाच किलोमीटर लांबीचा बाह्यवळण रस्ता काढण्यात आला आहे. चार पदरी या रस्त्याच्या मधोमध दुभाजक बसवण्यात आले आहे. त्यामध्ये राष्ट्रीय महामार्ग विभागाने बोगन वेल व इतर फुल झाडे लावली आहेत. मात्र, बहुतेक ठिकाणी रस्त्याच्या मधोमध फुलझाडांऐवजी बाभूळ या काटेरी वृक्षाची वाढ झाली आहे. तसेच, उपरस्त्याच्या कडेलासुद्धा बाभळीचे वृक्ष वाढले आहेत. या वृक्षाच्या काटेरी फांद्या रस्त्याच्या कडेला वाकल्या असल्याने वाहतुकीस अडथळा ठरत आहेत. प्रामुख्याने दुचाकीस्वारांना या वाकलेल्या काटेरी फांद्यांचा त्रास होत आहे. काटेरी वृक्षांच्या फांद्या व काटे महामार्गावर पडत असल्याने याचा त्रास वाहन चालकांना होत आहे.
राष्ट्रीय महामार्ग विभागाने अपघाताला निमंत्रण ठरणारे काटेरी वृक्ष काढून त्या ठिकाणी फुल झाडे लावावीत. बाह्यवळण रस्त्यावरील नारायणवाडी उड्डाण पुलावरील बंद असलेले विद्युत पथ दिवे चालू करावेत, अशी मागणी शिवतेज ग्रुपचे अध्यक्ष सतीश पाटे यांनी केली आहे.