चाळीत युरिया टाकल्याने चार टन कांद्याचे नुकसान

नारायणगाव, ता. ३१ : चाळीत साठवून ठेवलेल्या कांद्यावर अज्ञात व्यक्तीने युरिया टाकल्याने पिंपळगावतर्फे नारायणगाव (ता. जुन्नर) येथील महिला शेतकऱ्याचा सुमारे तीन टन कांदा खराब होऊन चार लाख रुपयांचे नुकसान झाले आहे. या प्रकरणी मनीषा प्रवीण खांडगे यांनी नारायणगाव पोलिस ठाण्यात तक्रार दिली आहे.
मनीषा प्रवीण खांडगे या अल्पभूधारक महिलेने दोन एकर क्षेत्रात कांद्याची लागवड केली होती. बाजारभाव कमी असल्याने कांदा चाळ भाड्याने घेऊन त्यांनी मे महिन्यात कांदा काढणीनंतर तीन टन कांद्याची साठवणूक केली होती. मात्र, अज्ञात व्यक्तीने कांदा चाळीत युरिया टाकल्याने कांदा सडला. कांद्याला पाणी सुटल्याने कांद्याचे नुकसान झाले. यामुळे मनीषा खांडगे यांचे सुमारे चार लाख रुपयांचे नुकसान झाले आहे. या प्रकरणी त्यांनी नारायणगाव पोलिस ठाण्यात तक्रार दिली आहे.
दरम्यान, मनीषा खांडगे या आमच्या नातेवाईक आहेत. शेत जमिनीच्या वाटपावरून आमचा कौटुंबिक वाद सुरू आहे. दोन महिन्यांपूर्वी माझ्या कोथिंबिरीचे अज्ञात व्यक्तीने नुकसान केले होते. त्यानंतर मनीषा खांडगे यांच्या कांद्याचे नुकसान झाले आहे. याप्रकरणी पोलिसांनी तपास करून आरोपीला अटक करावी, अशी मागणी शेतकरी संघटनेचे पदाधिकारी प्रमोद खांडगे यांनी केली आहे.