नारायणगाव दुय्यम निबंधक कार्यालयाबाहेर बंदोबस्त

नारायणगाव, ता. १७ : वारूळवाडी (ता. जुन्नर) ग्रामपंचायत हद्दीतून सोमवारी सायंकाळी नारायणगाव (ता. जुन्नर) येथील आशीर्वाद इन्फ्रास्ट्रक्चर यांच्या खासगी जागेत नाट्यमयरीत्या पोलिस बंदोबस्तात स्थलांतरित केलेले नारायणगाव दुय्यम निबंधक कार्यालयाचे कामकाज मंगळवारी (ता. १७) सकाळपासून नवीन जागेत दुय्यम निबंधक डी. बी. भोसले यांनी सुरू केले. यावेळी नवीन कार्यालय व जुन्या कार्यालयाच्या इमारती बाहेर पोलिस बंदोबस्त ठेवण्यात आला होता.
दस्त नोंदणीसाठी नवीन कार्यालयात मोठी गर्दी झाली होती. आशीर्वाद इन्फ्रास्ट्रक्चरचे मालक सुरेश खैरे, सचिन शेलोत यांनी दस्त नोंदणीसाठी आलेले नागरिक व दुय्यम निबंधक व कर्मचारी यांचे गुलाब पुष्प देऊन स्वागत केले.
दरम्यान, वारूळवाडी ग्रामस्थांची राजकीय ताकद कमी पडली. राजकीय बळाचा वापर करून लोकप्रतिनिधीने शासकीय कार्यालय खासगी जागेत हलवण्यात आले आहे. ग्रामस्थांना न्याय मिळेपर्यंत आम्ही न्यायालयीन लढाई सुरू ठेवणार आहोत, असे वारूळवाडीचे सरपंच विनायक भुजबळ यांनी सांगितले.