बंद घरे फोडण्याकडे चोरट्यांचा कल

नारायणगाव, ता. ६ : आळेफाटा व ओतूर पोलिस ठाण्याच्या हद्दीत मागील काही दिवसांत घरफोड्या व चोरीचे प्रमाण वाढले आहे. शेतकरी आषाढी वारीला गेले असल्याने बंद घरांमध्ये चोऱ्या करण्याकडे चोरट्यांचा कल आहे.
या पार्श्वभूमीवर ग्राम सुरक्षा दल, पोलिस मित्र यांच्या मदतीने नारायणगाव पोलिसांनी गस्त वाढवली आहे. नागरिकांनी अधिक सतर्क राहावे. आपल्या भागात फिरणाऱ्या संशयास्पद नागरिकांची माहिती तत्काळ पोलिसांना द्यावी, असे आवाहन सहाय्यक पोलिस निरीक्षक महादेव शेलार यांनी केले आहे.
आळेफाटा व ओतूर पोलिस ठाण्याच्या हद्दीतील पिंपळवंडी, आळेफाटा, पिंपरी पेंढार भागात चोरीच्या चार ते पाच घटना झाल्या आहेत. आज रविवारी (ता. ६) पहाटे आळेफाटा (ता. जुन्नर) येथे दोन वाजण्याच्या सुमारास दोन घरफोड्या झाल्या आहेत. वाढलेल्या चोऱ्यांच्या घटनांमुळे पोलिस सावध झाले आहेत. याबाबत सहाय्यक पोलिस निरीक्षक शेलार म्हणाले की, ‘‘चोऱ्या घरफोड्यावर आळा घालण्यासाठी पोलिस अधिकारी, अंमलदार, पोलिस पाटील, ग्रामसुरक्षा दलाचे जवान, पोलिस मित्र, पत्रकार यांचा समावेश असलेला ग्रुप तयार केला आहे. ग्राम सुरक्षा दल आपल्या गावात रात्र गस्त घालत आहेत.’’ गावातील मुख्य चौकात सीसीटीव्ही कॅमेरे बसवावेत, असे आवाहन नारायणगाव पोलिस ठाण्याच्या हद्दीतील ग्रामपंचायतींना करण्यात आले आहे.
नारायणगाव पोलिस ठाण्याच्या वतीने दररोज रात्री गस्त घातली जात आहे. हॉटेल, लॉज व इतर व्यावसायिक दुकाने रात्री ११ पूर्वी बंद केली जात आहेत. मोबाईल दुकान मालक, भंगार विक्रेते, सोनार यांची बैठक घेऊन चोरीचा माल विक्रीसाठी आल्यास नारायणगाव पोलिस ठाण्याला कळविण्यास सांगितले आहे.