चोरट्यांनी पळविली मोटारीतील पिशवी

नारायणगाव, ता. १५: येथील बँक ऑफ बडोदा शाखेत ठेव (डिपॉझिट) ठेवून अजित अशोकराव कोल्हे हे मोटारीतून घरी निघाले होते. यावेळी मोटरसायकलवर आलेल्या दोघांनी तुमच्या गाडीच्या हवा कमी झाली आहे. असे सांगून मोटारीतील पिशवी घेऊन चोरटे मोटरसायकलवर पसार झाले. बॅगेमध्ये पाच हजार रुपये, ठेव पावत्या, आधार कार्ड व इतर कागदपत्रे होती. ही घटना आज सायंकाळी साडेचार वाजण्याच्या सुमारास येथील पुणे नाशिक महामार्गावर घडली. घटनास्थळी नारायणगाव ठाण्याचे पोलिस कर्मचारी आले होते. स्थानिक नागरिकांनी चोरट्यांचा पाठलाग केला. मात्र ते पसार झाले.
दरम्यान, वारूळवाडी येथील साने वस्ती येथे मागील आठवड्यात भर दिवसा दोन फ्लॅटचा कडी कोयंडा तोडून चोरट्यांनी सोन्याचे दागिने चोरून नेले होते. या दोन्ही घटना वरून चोरटे रेकी करून चोरी करत असल्याचे निष्पन्न होत आहे. नागरिकांनी सतर्क राहावे, असे आवाहन नारायणगाव पोलिस ठाण्याच्या वतीने करण्यात आले आहे.