नारायणगाव, वारूळवाडीत भरदुपारी घरफोडी

नारायणगाव, ता. १८ : मोटारीतून आलेल्या हायफाय चोरट्यांनी नारायणगाव व वारूळवाडी हद्दीतील गजबजलेल्या वस्तीत तीन बंद फ्लॅटचा कडी कोयंडा भर दिवसा तोडला व १५ तोळे सोन्याच्या दागिन्यांची लूट करून घरफोडी केली. ही घटना १० जुलै २०२५ रोजी घडली आहे.
शासकीय दरानुसार चोरी झालेले सोन्याचे, चांदीचे दागिने व रोख रक्कम सात लाख ७४ हजार रुपये किमतीचा ऐवज चोरट्याने चोरून नेला आहे. याप्रकरणी नारायणगाव पोलिस ठाण्यात चोरट्यांच्या विरोधात गुन्हा दाखल केला आहे. मागील काही दिवसात नारायणगाव परिसरामध्ये चोऱ्या वाढल्यामुळे नागरिकांमध्ये भीतीचे वातावरण आहे. पोलिसांनी तपास करून चोरट्यांचा छडा लावावा, अशी मागणी नारायणगाव व वारुळवाडी परिसरात गृहनिर्माण सोसायटीमध्ये राहणाऱ्या नागरिकांनी केली आहे.
अज्ञात चोरट्यांनी १० जुलै २०२५ रोजी दुपारी बारा वाजण्याच्या सुमारास नारायणगाव ग्रामपंचायत हद्दीतील शेटेमळा येथील ओंकार हाईटसमधील (फलॅट नं. १०७) मंडल अधिकारी राजेंद्र अडसरे यांच्या बंद सदनिकेच्या दरवाजाचा कडी कोयंडा तोडला व लोखंडी कपाटाचा लॉकर तोडून तीन तोळे सोन्याचे दागिने चोरून नेले. त्यानंतर कोल्हे मळा येथील आराध्य हाईटसमधील (सी विंग फलॅट नं १०१) उषा धांदवड यांच्या सदनिकेतील कपाटातील अडीच तोळे वजनाचे सोन्याचे दागीने चोरून नेले. दुपारी एक वाजण्याच्या सुमारास वारूळवाडी ग्रामपंचायत हद्दीतील नीता शेळके यांच्या कमल प्लाझा सोसायटीमधील (बि विंग फलॅट नं. १०२) सदनिकेच्या कपाटातील साडेनऊ तोळे वजनाचे सोन्याचे दागिने, चांदीच्या वस्तू व रोख रक्कम चार हजार रुपये असा चार लाख ९९ हजार रुपये किमतीचा मुद्देमाल चोरून नेला.
दरम्यान, तीनही फ्लॅट मालक सकाळी दहानंतर नोकरीनिमित्त फ्लॅट बंद करून गेल्यानंतर या चोऱ्या झाल्या आहेत. नोकरी व्यवसायानिमित्त फ्लॅट बंद करून गेल्यानंतर चोरटे डाव साधत असल्याचे यापूर्वीही दिसून आले आहे. बंद फ्लॅट फोडण्याच्या घटना या भागात वारंवार होत आहेत. मागील वर्षभरात चोरट्यांनी सुमारे ४० तोळे सोन्याचे दागिने चोरून नेले आहेत. सोसायटीमध्ये सीसीटीव्ही कॅमेरे बसवा, सुरक्षारक्षकाची नेमणूक करा, बंद फ्लॅटमध्ये मौल्यवान वस्तू ठेवू नका. असे आवाहन वारंवार नारायणगाव पोलिसांच्या वतीने करण्यात आले आहे. मात्र याकडे गृहनिर्माण सोसायट्याचे पदाधिकारी दुर्लक्ष करत आहेत.