नारायणगावात मोटारीतून लांबविले पाच लाख

नारायणगाव, ता. १९: राजगुरुनगर येथील भाजीपाला व्यापारी कैलास मधुकर गोगावले (वय ४५) यांची पाच लाख रुपयांची रोख रक्कम असलेली पिशवी चोरट्यांनी त्यांच्या मोटारीतून लांबविली. गोगावले मोटारीला लॉक लावण्याचे विसरल्याने चोरट्याने संधी साधली. ही घटना शुक्रवारी (ता. १८ रात्री आठ ते नऊ वाजण्याच्या सुमारास नारायणगाव येथील निलायम हॉटेलच्या पार्किंगमध्ये घडली.
चोरीप्रकरणी नारायणगाव पोलिस ठाण्यात चोरट्यांच्या विरोधात गुन्हा दाखल केला आहे. व्यापारी गोगावले यांचा भाजीपाला खरेदी विक्रीचा व्यवसाय आहे. ते शुक्रवारी दुपारी दोन वाजता गोगावले हे टिंबर मार्केट येथील व्यापाऱ्याकडे उधारीचे पैसे आणण्यासाठी गेले. तेथील व्यापाऱ्यांकडून दहा लाख रुपयांची रोख रक्कम घेऊन ते खेड येथील बाजार समितीच्या आवारात आले. यावेळी त्यांच्यासोबत त्यांचा मित्र सचिन सुरेश खंडागळे (रा. राजगुरुनगर, थिगळस्थळ ता. खेड) हे होते. राजगुरुनगर येथील बाजार समितीच्या आवारातून शेतकऱ्यांच्या भाजीपाला खरेदीची बिल घेऊन ते जुन्नर येथे आले. सावरगाव (ता. जुन्नर) येथील शेतकरी ज्ञानेश्वर लहू पाबळे यांच्याकडे पाच लाख रुपयांची रोख रक्कम दिली. उर्वरित पाच लाख रुपयांची रक्कम घेऊन खेड येथे जाण्यासाठी निघाले. दरम्यान रात्री आठ वाजण्याच्या सुमारास नारायणगाव येथील पुणे नाशिक महामार्गालगत असलेल्या हॉटेल निलायम येथे जेवण्यासाठी थांबले. त्यांनी त्यांची मोटार हॉटेलच्या आवारात पार्किंग करताना पैसे असलेली पिशवी शीट खाली ठेवली. मात्र गाडी लॉक करण्याचे ते विसरून गेले. नऊ वाजण्याच्या सुमारास जेवण करून आल्यानंतर मोटारीतील पैसे असलेले पिशवी चोरीला गेली असल्याचे त्यांच्या लक्षात आले. या प्रकरणी त्यांनी नारायणगाव पोलिस ठाण्यात तक्रार दिली आहे.