धुमाकूळ घालणारे तीन बिबट्ये जेरबंद

नारायणगाव, ता. ४: पिंपळगावतर्फे नारायणगाव ग्रामपंचायत परिसरात १५ जुलै ते ४ ऑगस्टदरम्यान धुमाकूळ घालणाऱ्या तीन मादी बिबट्यांना जेरबंद करण्यात वनविभागाच्या अधिकाऱ्यांना यश आले आहे.
वाणी मळा शिवारात वनविभागाने लावलेल्या पिंजऱ्यात सोमवारी (ता. ४) पहाटे बिबट्या जेरबंद झाला. हा बिबट सुमारे दोन वर्षे वयाचा मादी बिबट्या आहे. त्यास वनरक्षक ज्ञानेश्वर पवार, वन कर्मचारी खंडू भुजबळ, आपदा मित्र मास्टर ट्रेनर सुशांत भुजबळ यांनी माणिक डोह येथील निवारा केंद्रात हलवले.

पिंपळगावतर्फे नारायणगाव परिसरात अजून बिबट्या आहेत. या भागात नर बिबट्या असण्याची शक्यता आहे. यामुळे बिबट्याला जेरबंद करण्यासाठी पुन्हा पिंजरा लावा. त्यानंतरच जेरबंद झालेला बिबट्या हलवा, अशी मागणी शेतकऱ्यांनी केली. या मागणीवरून ग्रामस्थ व वनविभागाचे कर्मचारी यांच्यात बाचाबाची झाली.
दरम्यान, पूर्ण वाढ झालेले तीन मादी बिबटे तर ओझर येथे एक नर बिबट्या पिंजऱ्यात जेरबंद झाला आहेत. या भागातील ऊस क्षेत्रात अजूनही बिबट्या आहेत. नारायणगाव वनपरिक्षेत्रातील नारायणगाव, वारूळवाडी, मांजरवाडी, चिमणवाडी, आर्वी, गुंजाळवाडी या मीना नदी काठावरील बागायती क्षेत्रात या बिबट्यांनी धुमाकूळ घातला आहे.

बिबट्यासह आता तरसाचेही दर्शन
वनविभागाने लावलेल्या पिंजऱ्यात बिबट्या अडकल्यानंतर पुन्हा काही दिवसानंतर त्याच भागात बिबट्याचे दर्शन होत आहे. बिबट्याबरोबरच या भागात आता तरस सुद्धा दिसू लागले आहेत. या मुळे शेतकरी वर्गातून संताप व्यक्त होत आहे. आमच्या भागातील बिबट्यांचा कायमचा बंदोबस्त करा, अशी मागणी ग्रामस्थ करत आहेत.

06989