नेवकर पुलाची पुराच्या पाण्यामुळे दुरवस्था

नारायणगाव, ता. २९ : मीना नदीला आलेल्या पुराच्या पाण्यामुळे नारायणगाव- वारूळवाडी (ता. जुन्नर) या गावांना जोडणाऱ्या नेवकर पुलाच्या संरक्षक लोखंडी जाळ्या तुटून पुलावर पडल्या आहेत. यामुळे रहदारीस अडथळा येत असून, शालेय विद्यार्थी व दोन्ही गावातील नागरिकांची गैरसोय झाली आहे. स्थानिक ग्रामपंचायत किंवा सार्वजनिक बांधकाम विभागाने या पुलाची तातडीने दुरुस्ती करावी, अशी मागणी शालेय विद्यार्थी व ग्रामस्थांनी केली आहे.
वडज धरण पाणलोट क्षेत्रात अतिवृष्टी झाल्यामुळे रविवारी (ता. २८) सकाळी १० वाजता मीना नदी पात्रात १२ हजार क्युसेकने पाणी सोडले होते. त्यामुळे मीना नदीला पूर आला होता. रविवारी सकाळी ११ ते सायंकाळी पाच वाजेपर्यंत नेवकर पूल पाण्याखाली होता. पुराबरोबर वाहून आलेली झाडे- झुडपे पुलाच्या संरक्षक कठडे व लोखंडी जाळ्यांना अडकल्यामुळे पुलाचे मोठ्या प्रमाणात नुकसान झाले आहे. लोखंडी मोडून पुलावर पडल्या आहेत. यामुळे पुलावरून ये- जा करताना अडथळा होत आहे. वारूळवाडी येथे ग्रामोन्नती मंडळ संचलित महाविद्यालय, माध्यमिक शाळा, बालक विद्यामंदिर आदी शैक्षणिक संस्था व भागेश्वर दूध संस्था आहे. नारायणगाव येथे भाजी बाजार आहे. नारायणगाव, वारूळवाडी भागातील नागरिकांना ये- जा करण्यासाठी नेवकरपूल हा जवळचा मार्ग आहे. पुराच्या पाण्यामुळे पुलाचे नुकसान झाल्याने शालेय विद्यार्थी व नागरिकांना धोकादायक पद्धतीने ये- जा करावी लागत आहे. सध्या मीना नदी दुथडी भरून वाहत आहे. नागरिकांची रहदारीची गैरसोयी दूर व्हावी व दुर्घटना टाळण्यासाठी पुलाची तातडीने दुरुस्ती करावी, अशी मागणी पालक व शालेय विद्यार्थ्यांनी केली आहे.

07265