वळवाडीत शेळी ठार

नारायणगाव, ता. १६ : वळणवाडी येथे बिबट्याने केलेल्या हल्ल्यात शेळी ठार झाली. ही घटना मंगळवारी (ता. १६) दुपारी दोनच्या सुमारास घडली. बिबट्यांचे दिवसा वाढलेले हल्ले पाहता ऊस तोडणी झाल्यामुळे बिबटे अधिक आक्रमक झाल्याचे स्पष्ट झाले आहे. दरम्यान, माहिती मिळताच घटनास्थळी नारायणगाव वनपरिक्षेत्र विभागाचे वनरक्षक ज्ञानेश्वर पवार यांनी भेट दिली. घटनेचा पंचनामा केला असून घटनास्थळी बिबट्याचे ठसे आढळून आले आहेत.वनरक्षक ज्ञानेश्वर पवार यांनी दिली.
वळणवाडी नंबर वाडी शिवारात नारायण आडसरे हे मंगळवारी दुपारी शेळ्या चारत होते. दरम्यान उसाच्या शेतातून आलेल्या बिबट्याने शेळ्यांच्या कळपामधील एका शेळीवर हल्ला केला. काही क्षणात शेळीच्या मानेला धरून बिबट्या शेळीला घेऊन गेला.

नारायणगाव वनपरिक्षेत्रात वाढलेली बिबट्यांची संख्या विचारात घेता हल्ल्यांची माहिती घेऊन शेतकऱ्यांनी केलेल्या मागणीनुसार बिबट्यांना जेरबंद करण्यासाठी १८ पिंजरे लावले आहेत. अजून सहा नवीन पिंजरे उपलब्ध झाले आहेत. उपवनसंरक्षक प्रशांत खाडे यांच्या मार्गदर्शनाखाली हल्ले रोखण्यासाठी विविध उपाययोजना केल्या जात आहेत. शेतकऱ्यांनी उसाच्या शेताजवळ लहान मुलांना ठेवून शेतात काम करू नये. लहान मुलांची विशेष काळजी घ्यावी. सध्या कांदा लागवड व गहू खुरपणीची कामे सुरू आहेत. उसाच्या शेताजवळ वाकून अथवा बसून शेताची मशागत करताना विशेष काळजी घ्यावी.
- ज्ञानेश्वर पवार, वनरक्षक