‘ग्रामोन्नती’च्या संकुलामध्ये कृत्रिम रेतन प्रशिक्षण संस्था

नारायणगाव, ता. ३ : ग्रामोन्नती मंडळ संचलित कृषी शिक्षण संकुलातील पशुधन व्यवस्थापन दुग्धोत्पादन पदविका या अभ्यासक्रमाअंतर्गत महाराष्ट्र शासनाच्या पशुसंवर्धन विभागाच्या गोजातीय प्रजनन प्राधिकरणाच्या ‘कृत्रिम रेतन प्रशिक्षण संस्था’ म्हणून मान्यता मिळाली आहे.
महाराष्ट्र शासन पशुसंवर्धन आयुक्तालयाने नियुक्त केलेल्या तज्ज्ञ समितीने संस्थेकडील उपलब्ध सोयीसुविधा, मनुष्यबळाची पाहणी केली. त्यानंतर महाराष्ट्र गोजाती प्रजनन नियंत्रण प्राधिकरण आयुक्त डॉ. प्रवीण कुमार देवरे यांनी कृत्रिम रेतन प्रशिक्षण संस्था नोंदणी प्रमाणपत्र संस्थेला दिले, अशी माहिती ग्रामोन्नती मंडळाचे कार्याध्यक्ष अनिल मेहेर यांनी दिली.
पशुपालन क्षेत्रात शिक्षण घेणाऱ्या विद्यार्थ्यांना, तसेच कृत्रिम रेतन या विषयामध्ये पशुसेवा देण्यास इच्छुक असणाऱ्या विद्यार्थ्यांना नारायणगाव येथे प्रशिक्षण दिले जाणार आहे. त्यामुळे व्यवसायाभिमुख प्रशिक्षण देण्याचा ग्रामोन्नती मंडळ या संस्थेचा उद्देश अधिकाधिक समृद्ध होत आहे. या केंद्राचे प्रमुख म्हणून प्राचार्य राधाकृष्ण गायकवाड हे काम पाहणार आहेत, तर विभाग प्रमुख डॉ. संतोष दानवे हे कार्यरत आहेत. या केंद्रासाठी आवश्यक असणाऱ्या सोयी सुविधा उभारण्याचे काम सुरू असून, लवकरच या केंद्राच्या सेवा सुविधा सुरू होतील. अधिक माहितीसाठी ९८६०४९२०७० या क्रमांकावर संपर्क साधावा, असे आवाहन कृषी शिक्षण संकुलाचे प्रमुख रत्नदीप भरवीरकर यांनी केले.