बनेश्वरमध्ये आढळला दुर्मीळ बेडडोम मांजऱ्या साप

नसरापूर, ता.३ : नसरापूर (ता. भोर) येथील बनेश्वर वनउद्यानात सह्याद्रीच्या घनदाट जंगलात क्वचित अढळणारा दुर्मीळ बेडडोम मांजऱ्या जातीचा साप आढळून आला. सर्पमित्रांनी त्यास पकडून नैसर्गिक अधिवासात सोडून दिले.
बनेश्वर वनउद्यानाच्या वाहनतळ परिसरात एका वाहनावर झाडावरून हा साप पडला. तेथील सुरक्षारक्षक करण जाधव यांनी याबाबत पुणे जिल्हा वन्यप्राणी व सर्परक्षक असोशिएनचे कार्याध्यक्ष विशाल शिंदे यांना माहिती दिली. सर्पमित्र विलास धोंगडे, संतोष पाटील व श्रीकांत खेडकर या सर्पमित्रांनी घटनास्थळी येऊन पाहणी केली. अतिदुर्मीळ मांजऱ्या प्रजातीचा साप असल्याचे त्यांच्या निदर्शनास आले. सौम्य विषारी आणि रात्री सक्रीय असलेला हा साप सह्याद्रीच्या घनदाट जंगलात क्वचित आढळतो. त्याचे डोळे मांजरासारखे मोठे असतात म्हणून त्याला मांजऱ्या किंवा कॅट स्नेक असे देखील म्हणतात. दरम्यान, सर्पमित्रांनी त्यास सुरक्षित पकडून नैसर्गिक अधिवासात सोडून दिले.
सर्पमित्र विलास धोंगडे यांनी माहिती देताना सांगितले कि, सुमारे एक मीटर लांबीचा फिक्कट पट्टे असलेला हा साप अत्यंत लाजाळू आणि मानवांपासून दूर राहणारा असतो. झाडावर राहतो व रात्री सक्रिय असतो. झाडावरील कीटक, पाली, बेडूक हे त्याचे खाद्य असते. मानवासाठी याचा फारसा धोका नसतो. दुर्मीळ असलेला हा साप भोर तालुक्यात या अगोदर सापडल्याची नोंद नाही.

नागरिकांना दुर्मिळ सापांविषयी कमी माहिती असते. अशा ते वेगळ्या वन्यजीवांना मारुन टाकतात. नागरिकांनी काही वेगळे प्राणी दिसले तर न मारता वन्यजीव संघटनेच्या वन्यप्रेमी व सर्पमित्रांशी संपर्क साधावा व दुर्मीळ वन्यजीवांना वाचवावे.
- विशाल शिंदे, कार्याध्यक्ष,
पुणे जिल्हा वन्यप्राणी व सर्परक्षक असोशिएशन

05422