हरिश्चंद्रीत ट्रकच्या धडकेत दुचाकीस्वार गंभीर जखमी

नसरापूर, ता. ७ : पुणे- सातारा महामार्गावर हरिश्चंद्री (ता. भोर) येथे भरधाव ट्रकने पुढे चाललेल्या दुचाकीस मागून ठोकर मारल्याने झालेल्या अपघातात दुचाकीवर मागे बसलेल्या तरुण गंभीर जखमी झाला. अपघातानंतर ट्रक सोडून पळुन गेलेल्या चालकाविरुध्द तक्रार दाखल केला आहे.
याबाबत दुचाकी चालक सुरज किशोर भोंगळे (वय २२, रा. थेरगाव- पिंपरी चिंचवड) याने राजगड पोलिस ठाण्यात फिर्याद दिली आहे. पुणे- सातारा महामार्गावरून रात्री पावणेदोन वाजण्याच्या सुमारास सुरज व त्याचा मित्र महेश थोरात असे दोघे दुचाकीवरून (क्र. एम.एच. १४ के.झेड. ४७०६) नारायणपूर येथे जात असताना महामार्गावर हरिश्चंद्री येथे मागून येणाऱ्या भरधाव ट्रकवरील (क्र. एम.एच. ४६ बी.बी. ९९४३) चालकाने नियमांकडे दुर्लक्ष करुन ट्रक चालवून समोर चाललेल्या सुरज याच्या दुचाकीस मागून जोरदार ठोकर मारली. या अपघातात दुचाकीवर मागे बसलेला महेश थोरात याला डोक्याला हाताला व पायाला गंभीर दुखापत झाली. यावेळी शेजारून जाणाऱ्या मोटारीचे (क्र. एम.एच. ०५ बी.एस. ३७०१) देखिल नुकसान झाले. या अपघातानंतर ट्रकवरील चालक ट्रक तेथेच सोडून पळुन गेला. त्याच्या विरुद्ध राजगड पोलिस ठाण्यात गुन्हा दाखल केला आहे. पुढील तपास पोलिस हवालदार राहुल कोल्हे करत आहेत.