नसरापूर परिसरात ओढ्या-नाल्यांना पूर

नसरापूर, ता.१९ : भोर तालुक्यात दिवसभर मुसळधार पडणाऱ्या पावसाने सर्वत्र पाणीच पाणी केले. पुणे-सातारा महामार्गासह नसरापूर परिसरातील छोटे, रस्ते, पुल पाण्याखाली गेले तर ओढे नदी नाल्यांना पूर आला आहे. शेतकऱ्यांचे मात्र या पावसाने मोठे नुकसान झाले.

शेतकऱ्यांनी भाताच्या रोपासाठी टाकलेले बियाणे देखील पाण्यात वाहून गेल्याने भात लावणीसाठी भात रोपे अत्यंत कमी प्रमाणात उपलब्ध होणार आहेत. नसरापूर परिसरात बुधवारी (ता.१८) रात्रीपासून सुरू झालेला पाऊस गुरुवारी (ता.१९) देखhल दिवसभर धुवाधार पडत होता. यामुळे सर्वत्र पाणीच पाणी झाल्याने जनजीवन विस्कळित झाले. पुणे सातारा महामार्गावर अनेक ठिकाणी सेवा रस्ता व मुख्य रस्त्यावर पाण्याची तळी साचली. बहुतेक उड्डाणपुलांच्या खाली देखील मोठ्या प्रमाणात पाणी साठल्याने वाहतुकीस मोठा अडथळा झाला.
खेडशिवापूर टोलनाक्या जवळील खोपी (ता.भोर) येथील उड्डाणपुला खाली जवळील डोंगरातून व रस्त्याने वाहून येणारे पाणी निचरा होण्यास योग्य व्यवस्था नसल्याने पुलाखाली जवळपास तीन फूट पाणी साठले होते सेवा रस्त्याने येणाऱ्या वाहन चालकांना मोठी कसरत करत या ठिकाणावरून प्रवास करावा लागत होता.
महामार्गावर काम चालू असलेल्या शिवरे व हरिश्चंद्री येथे देखील जोरदार पावसाने काम ठप्प होऊन त्याचा परिणाम वाहतुकीवर झाला होता.
परिसरातील शिवगंगा नदी, गुंजवणी, नदी नीरा नदी या नद्यांसह लहानमोठे ओढे नाले देखील दुथडी भरून वाहून पूरपरिस्थिती निर्माण झाली आहे तर शेतात शेतकऱ्यांनी केलेली पेरणी वाया जाण्याची भीती निर्माण झाली आहे.

05496