नसरापूर ग्रामपंचायतीमध्ये तोडफोड करणाऱ्यावर गुन्हा

नसरापूर, ता. ७ ः नसरापूर (ता. भोर) गावचा रहिवासी नसलेल्या एकाने कोणतेही कारण नसताना सोमवारी (ता. ७) दुपारी सव्वा बारा वाजता नसरापूर ग्रामपंचायतीमध्ये येऊन धुडगूस घालून कर्मचाऱ्यांना शिवीगाळ करून दमदाटी देत ग्रामपंचायतीमधील साहित्याची तोडफोड केली. याप्रकरणी राजगड पोलिस ठाण्यात गुन्हा दाखल केला आहे. मंगेश हनुमंत शिंदे (वय ४५, रा. नायगाव, ता. भोर) असे तोडफोड करणाऱ्या आरोपीचे नाव आहे. शिंदे याने ग्रामपंचायतीमध्ये काम करणाऱ्या दोन महिला सेविका व एक कर्मचारी यांना जोरजोराने ओरडून सरपंच, ग्रामसेवक कुठे आहे असे विचारले. त्यानंतर त्याने अचानक ग्रामसेवकांच्या टेबलवरील साहित्याची तोडफोड केली, फाइल फेकून दिल्या. कर्मचारी रूपेश ओव्हाळ यांनी त्याला तेथून हटकून हाकलून लावले. यापूर्वीही शिंदे याने ग्रामपंचायतीमध्ये येऊन दमदाटी अरेरावी केली होती. याप्रकरणी माजी उपसरपंच संदीप कदम, उपसरपंच नामदेव चव्हाण ग्रामपंचायत अधिकारी विजयकुमार कुलकर्णी यांच्या समवेत ग्रामपंचायत कर्मचारी रूपेश ओव्हाळ यांनी राजगड पोलिस ठाण्यात तक्रार दिली आहे. याप्रकरणी राजगड पोलिस पुढील तपास करत आहेत.