कथित आध्यात्मिक गुरूकडून आर्थिक फसवणूक

खेड शिवापूर, ता. ९ : ‘गोशाळा व्यवसायात मोठा परतावा मिळेल’ असे आमिष दाखवून कथित आध्यात्मिक गुरू सचिन बाळासाहेब सापळे ऊर्फ मामा महाराज (रा. हुबळी, कर्नाटक) याने काही भाविकांची आर्थिक फसवणूक केल्याचा प्रकार समोर आला आहे. या प्रकरणी राजगड पोलिस ठाण्यात फसवणुकीचा गुन्हा दाखल केला आहे.
मामा महाराज याने गोशाळा व्यवसायाच्या नावाखाली भाविकांना आमिष दाखवत त्यांच्याकडून लाखो रुपये उकळले. वैभवी जनार्दन वाडकर (वय ४०, रा. भायखळा, मूळगाव गराडे, ता. पुरंदर) यांनी दिलेल्या तक्रारीनुसार, त्यांनी व त्यांच्या वडिलांनी एकूण १० लाख ५० हजारांची गुंतवणूक केली. यापैकी साडेसात लाख रुपये ऑनलाइन पद्धतीने, तर उर्वरित तीन लाख रुपये मामा महाराजांनी हॉटेलमध्ये प्रत्यक्ष रोख स्वरूपात घेतल्याचे तक्रारीत नमूद आहे.
वाडकर यांचे वडील जनार्दन वाडकर यांना अध्यात्मात रस असल्याने स्थानिक टेलरने त्यांची ओळख मामा महाराजाशी करून दिली. ‘गोशाळा व्यवसायातून मोठा नफा मिळतो’ असे सांगत त्यांनी गराडे येथील त्यांच्या जमिनीवरच गोशाळा उभारण्याचे आश्वासन दिले. विश्वास मिळवण्यासाठी बँकेचे साडेसात लाखांचे धनादेशही दिले. मात्र, गुंतवणूक झाल्यानंतर मामा महाराजांनी टाळाटाळ सुरू केली. आजारी असल्याचे सांगत संपर्क टाळला. धनादेश न वटल्याने फसवणूक झाल्याचे लक्षात येताच वाडकर यांनी जिल्हा पोलिस अधीक्षक आणि राजगड पोलिस ठाण्यात तक्रार दिली. या प्रकरणाची चौकशी राजगड पोलिस ठाण्याचे उपनिरीक्षक अजित पाटील करीत आहेत. फसवणूक झालेल्या इतर नागरिकांनीही पुढे यावे, असे आवाहन पोलिसांनी केले आहे.

अजून एका व्यक्तीची फसवणूक
या मामा महाराजानी खेड शिवापूर येथील सीमित कोंडे यांनाही, ‘तुमची ग्रहदशा ठीक नाही, माझ्यासह ५० जणांना अन्नदान करा, त्यानंतर तुमच्या आर्थिक अडचणी दूर होतील,’ असे सांगत त्यांच्याकडून सहा लाख ३५ हजार रुपये घेतले. तसेच, त्यांच्या कंपनीत गुंतवणुकीचेही आमिष दाखवण्यात आले.