बेकायदा हत्यार बाळगल्याप्रकरणी दोघांना अटक

खेड शिवापूर, ता. १९ : गाऊडदरावरुन (ता. हवेली) श्रीरामनगरकडे जाणाऱ्या रस्त्यावर बेकायदेशीर कोयत्यासारखे घातक हत्यार घेऊन फिरत असल्याप्रकरणी राजगड पोलिस व जिल्हा गुन्हे शाखेच्या पथकाने दोघांना अटक केली. शनिवारी त्यांना न्यायालयात हजर केले असता न्यायालयाने त्यांना दोन दिवसांची पोलिस कोठडी सुनावली आहे.
आदित्य संतोष प्रजापती (वय २०, रा. जांभूळवाडी, पुणे) व निवृत्ती रामभाऊ मोहिते (वय २१, रा. आंबेगाव खुर्द, पुणे) अशी अटक झालेल्यांची नावे आहेत. जिल्हा गुन्हे शाखेचे पोलिस हवलदार अमोल शेडगे यांनी याबाबत राजगड पोलिस ठाण्यात फिर्याद दिली. शुक्रवारी (ता. १८) रात्री पावणे दहा वाजण्याच्या सुमारास गाऊडदरा ते श्रीरामनगर गावच्या रस्त्यावर दिनकर वाव्हळ यांच्या घरासमोर प्रजापती व मोहिते हे दोघे दोन कोयते हातात बाळगून असल्याचे आढळले. अप्पर जिल्हाधिकारी पुणे यांच्याकडून पुणे ग्रामिण जिल्ह्यात ११ ते २४ जुलैपर्यंत घातक शस्त्रे बाळगण्यास मनाई आदेश असताना हे दोघे घातक शस्त्र घेऊन फिरत होते. त्यामुळे भारतीय हत्यार कायद्यानुसार पोलिसांनी त्यांच्यावर कारवाई केली. याबाबत पुढील तपास पोलिस नाईक ए.आय. मेस्त्री करत आहेत.