वीरवाडीत तीन चंदन चोरटे ताब्यात

नसरापूर, ता. ८ : गावातील शिवारातील चंदनाच्या झाडांची तोड करून चंदन चोरट्यांचा सुळसुळाट झाला आहे. रविवारी (ता. ५) दुपारी चार वाजता चोरट्यांना विरवाडी ग्रामस्थांनी चंदनाची चोरी करतानाच ताब्यात घेऊन राजगड पोलिसांच्या हवाली केले. पोलिसांनी तीन चोरट्यांवर गुन्हा दाखल करून त्यांना अटक केली असून त्यांच्याकडून १२ हजार रुपये किमतीचे तीन किलो चंदन, झाड तोडण्याची कुऱ्हाड, खोदण्याची कुदळ व ५० हजार रुपयांची मोटारसायकल असा मिळून ६२ हजार रुपयांचा मुद्देमाल जप्त केला आहे. महेश मुकेश भोसले (वय २८), अंकिता मनेष भोसले (वय २५, दोघेही रा. भादे, ता. खंडाळा, जि. सातारा) व गायत्री जकल पवार (वय ४० रा. शेडगेवाडी, ता. खंडाळा, जि. सातारा) असे अटक करण्यात आलेल्यांची नावे आहेत. तर वीरवाडीचे माजी सरपंच विजय शिळीमकर यांनी फिर्याद दिली आहे. पुढील तपास पोलिस हवालदार औदुंबर आडवाल करत आहेत.