सारोळे येथे युवकाची आत्महत्या

नसरापूर, ता. ९ : सारोळे (ता. भोर) गावातील मस्जिदमध्ये छताच्या पंख्याला गळफास घेऊन एकाने आत्महत्या केल्याची धक्कादायक घटना गुरुवारी (ता. ९) सकाळी उघडकीस आली. इर्शाद इमाम शेख (वय ४०, रा. पांडे, ता. भोर) असे मृत व्यक्तीचे नाव आहे. सकाळी नागरिकांच्या निदर्शनास आल्यावर तत्काळ राजगड पोलिसांना माहिती देण्यात आली. राजगड पोलिस ठाण्यात या बाबत मृताचा भाऊ असिब इमाम शेख (वय ३८, रा. वडगाव मावळ, ता. मावळ) यांनी फिर्याद दिली आहे. यामध्ये इर्शाद याच्या मृत्यूस पूजा माने, पूजा हीचा भाऊ व मामा सुशांत विजय करंजकर, तसेच ओंकार भोसले (सर्वांचे पूर्ण नाव व पत्ता माहिती नाही) व इतर अनोळखी ३० ते ४० इसम जबाबदार असून, त्यांनी गैरसमजातून शारीरिक, मानसिक व आर्थिक दिलेल्या त्रासाला कंटाळून आत्महत्या केल्याचे फिर्यादीत नमूद केले आहे. या बाबत पूजा माने हिच्यासह इतरांविरोधात राजगड पोलिसांनी गुन्हा दाखल केला आहे. पुढील तपास पोलिस उपनिरीक्षक वृषाली देसाई करत आहेत.

05883