श्रीरामनगर येथे दुकानातून तीन लाखांचे साहित्य चोरी

खेड शिवापूर, ता. २४ : श्रीरामनगर- बांडेवाडी (ता. हवेली) येथील इलेक्ट्रिक मोटर रिपेअरींग व विक्रीच्या दुकानातून चोरट्यांनी २ लाख ९८ हजार १६९ रुपयांचे साहित्य चोरले.
याबाबत दुकान मालक सोपन विठ्ठल कोंडे (वय ५३, रा. कुसगाव) यांनी राजगड पोलिस ठाण्यात रविवारी (ता. २३) फिर्याद दिली आहे. त्यानुसार १७ नोव्हेंबर रोजी सायंकाळी ७ वाजता ते १८ नोव्हेंबर रोजी सकाळी ९ वाजण्याच्या दरम्यान त्यांच्या श्रीरामनगर येथील इलेक्ट्रिक मोटार रिपेअरींग व विक्रीच्या दुकानाच्या खिडकीचे लोखंडी ग्रिल कापून चोरट्यांनी दुकानात प्रवेश करून १ लाख ८६८ रुपयांची १२२ किलो वजनाची तांब्याची वायर, ४९ हजार ८८८ रुपयांची ५६ किलो वजनाची तांब्याची बुश, ७ हजार ९०० रुपयांची तांब्याची बुश, १ लाख ८०५ रुपयांची स्क्रॅप तांब्याची वायर, ९ हजार ९६ रुपयांची सबमिसिबल वायर, ८ हजार रुपयांचे गणमीटर बुश, २१ हजार ६१२ रुपयांच्या एसकेएफ बेअरिंग, असे एकूण २ लाख ९८ हजार १६९ रुपयांचे साहित्य चोरुन नेले. त्यानुसार अज्ञात चोरट्यांच्या विरोधात घरफोडीचा गुन्हा दाखल केला आहे. पुढील तपास साहाय्यक पोलिस निरीक्षक तुकाराम राठोड करत आहेत.