टोळक्याकडून मारहाणप्रकरणी अडीच महिन्यांनी गुन्हा दाखल

नसरापूर, ता. ८ : कामथडी (ता. भोर) येथे नऊ ते दहा तरुणांच्या गटाने सहा तरुणांना हॉकीस्टिक व लोखंडी रॉडने मारहाण केल्याच्या १४ ऑक्टोबर रोजी घडलेल्या घटनेबाबत न्यायालयाच्या आदेशानंतर राजगड पोलिस ठाण्यात ६ जानेवारी रोजी तक्रार दाखल झाली आहे.
याबाबत तृप्ती सचिन इंगुळकर (वय ३८, रा. कामथडी) यांनी फिर्याद दिली आहे. त्यानुसार १४ ऑक्टोबर २०२५ रोजी सायंकाळी पाच वाजण्याच्या दरम्यान त्यांचा मुलगा निशिकांत इंगुळकर व त्याचे मित्र गणेश धाडवे, घनश्याम कोंडे, दीपक इंगुळकर, सॅन्डी वाल्हेकर, अमर शेलार हे त्यांच्या घरात बसले असताना त्यांना गावातील सार्थक सुरेश वाल्हेकर याने घराचे बाहेर बोलावले. काहीवेळाने फिर्यादी तृप्ती इंगुळकर यांना भांडणाचा आवाज आल्यावर त्यांनी जाऊन पाहिले असता सार्थक वाल्हेकर याच्यासह साहिल बांदल, आकाश बांदल, रोहन इंगुळकर, गणेश वाल्हेकर व इतर चार ते पाच जण जमाव जमवून निशिकांत व त्यांच्या मित्रांना हॉकी स्टिक, लोखंडी रॉड व लाकडी काठ्याने मारहाण करत असल्याचे दिसले. यावेळी तृप्ती या भांडण सोडवण्यासाठी गेल्या असता त्यानादेखिल शिवीगाळ करत जिवे मारण्याची धमकी देण्यात आली. या मारहाणीत फिर्यादीचा मुलगा निशिकांत यास व गणेश धाडवे यांना गंभीर दुखापत झाली.
फिर्यादी तृप्ती इंगुळकर यांनी सार्थक वाल्हेकर याच्यासह साहिल बांदल, आकाश बांदल, रोहन इंगुळकर, गणेश वाल्हेकर व इतर चार ते पाच जणांविरोधात तक्रार दाखल केली. याबाबत राजगड पोलिस ठाण्यात गुन्हा दाखल करण्यात आला आहे. पोलिस हवालदार राहुल कोल्हे पुढील तपास करत आहेत.