''घोडगंगा''चे कामगार आंदोलनावर ठाम

न्हावरे, ता.३१ : न्हावरे (ता.शिरूर) येथील रावसाहेबदादा पवार घोडगंगा सहकारी साखर कारखान्याच्या कामगारांचे काम बंद आंदोलनावर अद्याप तोडगा निघाला नाही. यामुळे सोमवारी (ता.३१) ३१व्या दिवशीही कामगार त्यांच्या मागण्यांवर ठाम होते.
घोडगंगा कारखान्याकडून कामगारांना दहा महिन्यांचा पगार व इतर देणी मिळून कारखान्याकडे २५ कोटी रुपयांचे येणे बाकी प्रलंबित आहे. संबंधित मागण्यांसाठी कामगारांनी एक जुलैपासून आंदोलन सुरू केले आहे. दरम्यान, कामगारांची लवकरच देणी देण्यात येतील. कामगारांनी आंदोलन मागे घेऊन कामाला सुरुवात करावी, यासाठी आमदार ॲड. अशोक पवार व संचालक मंडळाने आजपर्यंत तीन वेळा विनंती केली. मात्र, प्रथम पन्नास टक्के प्रलंबित रक्कम खात्यावर जमा करा, तरच आम्ही कामाला सुरुवात करू या मागण्यांवर कामगार ठाम आहेत. यामुळे अद्यापही काम बंद आंदोलन सुरूच आहे.
दरम्यान, आज कारखान्याचे ज्येष्ठ संचालक व माजी उपाध्यक्ष दादापाटील फराटे यांनी चौथ्यांदा आंदोलस्थळी भेट दिली. यावेळी ते म्हणाले की, कामगारांनी अधिकच्या (जास्त) पगारवाढीसाठी काम बंद केले असते तर ते आंदोलन ठरेल पण तुम्ही तुमच्या मागणीसाठी जर काम बंद केले असेल तर याला आंदोलन म्हणता येणार नाही. मी आज संचालक मंडळात एकमेव विरोधी संचालक आहे. मात्र, मी कारखाना व कामगारांच्या हितासाठी राजकारण बाजूला ठेवून सत्ताधाऱ्यांशी चर्चा करून कामगारांचा सहानुभूतिपूर्वक विचार करावा, अशी विनंती मी संचालक मंडळाला केली आहे, असे त्यांनी कामगारांसमोर बोलताना फराटे यांनी सांगितले.
यावेळेस कामगार नेते महादेव मचाले, कामगार पतसंस्था संचालक तात्यासाहेब शेलार, नानासाहेब मासाळ, दत्तात्रेय महाराज लोंडे, मुकुंद परदेशी, अप्पासाहेब नारनोर, अनिल फलके, संतोष तांबे, संतोष कोळपे, महेंद्र काशीद व सर्व कामगार उपस्थितीत होते.

01728