‘गौरी शुगर’कडून शेतकऱ्यांच्या खात्यावर ३४६ कोटी जमा

न्हावरे, ता.२३ : शिरूर व श्रीगोंदा तालुक्यातील ऊस उत्पादक शेतकऱ्यांना फायदेशीर ठरणाऱ्या हिरडगाव (ता. श्रीगोंदा) येथील ओंकार ग्रुपच्या गौरी शुगर डिस्टिलरी प्रायव्हेट लिमिटेड साखर कारखान्याने नुकत्याच झालेल्या गळीत हंगामातील ऊस उत्पादक व ऊस वाहतूकदार शेतकऱ्यांच्या खात्यावर ३४६ कोटी रुपये जमा केले असल्याची माहिती ओंकार ग्रुपचे अध्यक्ष बाबूराव बोत्रेपाटील यांनी दिली.
मांडवगण फराटा (ता. शिरूर) येथे ऊस उत्पादक शेतकऱ्यांची व वाहतूकदारांच्या समस्या जाणून घेण्यासाठी बोत्रे यांनी बैठक घेतली. यावेळी ते म्हणाले, की गौरी शुगर डिस्टिलरी प्रायव्हेट लिमिटेड कारखान्याचे चालू वर्षाचे गाळप आठ लाख १४ हजार ६७१ टन उसाचे गाळप पूर्ण केले आहे. यामध्ये शिरूर तालुक्यातील ८६ हजार टन ऊस गाळप केला आहे. चालू वर्षी कारखाना व्यवस्थापनाने उसाला ३००६ टन बाजारभाव दिला. ऊस वाहतूकदारांनी ऊस तोडीबाबत करार करताना काळजी घ्यावी. तसेच आपण ऊस तोडी करणाऱ्यांना रक्कम देतो ती रक्कम बँकेच्या माध्यमातून द्यावी. अनेक ऊस तोडी करणारे मुकादम हे अनेक ऊस तोडी करणाऱ्या ऊस वाहतूकदारांकडून पैसे घेत असतात पण नंतर ऊस गाळप हंगाम सुरू झाला की ते येत नाहीत त्यामुळे ऊस वाहतूकदार संकटात सापडतो. त्यामुळे सुरुवातीला करार करताना ऊस वाहतूकदारांनी काळजी घ्यावी. तसेच ऊसतोडीसाठी पुढील वर्षी हार्वेस्टरचा वापर करावा तसेच हार्वेस्टर घेण्यासाठी अनुदान मिळत आहे. त्यामुळे शेतकऱ्यांनी त्याचा देखील लाभ घ्यावा.

शिरूर, श्रीगोंदा, कर्जत जामखेड, दौंड, करमाळाआदी परिसरातून ऊस वाहतूक करणारे वाहतूकदार व ऊस उत्पादक शेतकरी यांच्या खात्यावर ही रक्कम जमा होणार आहे. त्यामुळे ऊस उत्पादक शेतकऱ्यांनी पुढील वर्षी गाळपासाठी गौरी शुगर कारखान्याला ऊस द्यावा. शेतकऱ्यांनी बाजारभावाची चिंता करू नये. तुम्ही केलेले कष्टाची जाण ठेवून बाजारभाव चांगलाच देणार आहे.
- बाबूराव बोत्रे पाटील, अध्यक्ष, ओंकार ग्रुप

02007