आंबळे गावामध्ये दरोडा; महिलांना जबरी मारहाण

न्हावरे,ता. ६ : आंबळे(ता.शिरूर) येथे सहा चोरट्यांनी रविवारी (ता.६) मध्यरात्री घरात घुसून दोन महिलांवर दांडक्याने हल्ला केला. त्यांच्या अंगावरील सोन्या-चांदीचे सुमारे १ लाख ६४ हजार रुपयांचे दागिने लंपास केल्याची धक्कादायक घटना घडली आहे. याप्रकरणी शिरूर पोलिस ठाण्यात गुन्हा दाखल करण्यात आला आहे.
याप्रकरणी कल्पना प्रताप निंबाळकर (वय ६०, रा.आंबळे, ता.शिरूर) यांनी शिरूर पोलिस ठाण्यात फिर्याद दाखल केली आहे. या घटनेची शिरूर पोलिसांनी दिलेली माहिती अशी की कल्पना निंबाळकर ह्या त्यांच्या नातेवाईक रत्नाबाई शितोळे यांच्यासह घरी झोपल्या होत्या. दरम्यान रविवारी (ता.६) मध्यरात्री एक वाजता सहा अनोळखी इसमांनी घरात जबरदस्तीने प्रवेश केला. त्यानंतर चोरांनी दोनही महिलांना दांडक्याने मारहाण करून गळ्यातील व कानातील सोन्याचे दागिने हिसकावून घेतले.कल्पना निंबाळकर यांच्या गळ्यातील अर्धा तोळ्याचे मंगळसूत्र,कानातील एक तोळ्याची कर्णफुले व चांदीची जोडवी तसेच निंबाळकर यांच्या नातेवाइक असलेल्या रत्नाबाई शितोळे यांच्या गळ्यातील अर्धा तोळ्याची पोत,अर्धा तोळ्याची कर्णफुले असा एकूण १ लाख ६४ हजार रुपयांचा ऐवज चोरून नेला आहे.या घटनेमुळे परिसरात भीतीचे वातावरण निर्माण झाले असून,दरोडा टाकून चोरी करणारे सर्व सहा दरोडेखोर २० ते २५ वयोगटातले होते.त्याचप्रमाणे त्यांना मराठी भाषा उत्कृष्ट बोलता येत होती अशी माहिती फिर्यादी कल्पना निंबाळकर यांनी पोलिसांना दिली आहे.