विरोधात बिनधास्त लढा, पण बदलेली भाषा तपासा

निरगुडसर, ता. ३० : ‘‘भीमाशंकर कारखाना, बाजार समितीवर यापूर्वी काहींना काम करण्याची संधी दिली. आता त्यांच्या अपेक्षा वाढू लागल्या आहेत. तुम्ही बिनधास्त निवडणूक लढवा. माझा त्याला विरोध नाही, परंतु आपली बदललेली भाषा जरा तपासून पहा,’’ असा टोला सहकारमंत्री दिलीप वळसे पाटील यांनी देवदत्त निकम यांचे नाव न घेता लगावला.
वळती (ता. आंबेगाव) येथे राष्ट्रवादी काँग्रेस पक्षाचा चांडोली बुद्रुक गणात महायुती सहविचार मेळाव्यात मार्गदर्शन करताना मंत्री वळसे पाटील बोलत होते. ते म्हणाले, ‘‘सलग सात वेळा तालुक्यातील सर्व जनतेने मला प्रतिनिधित्व करण्याची संधी दिली. विविध खात्यांची मंत्रिपदे देखील मला मिळाली. मिळालेल्या पदांचा उपयोग मी सर्वसामान्यांच्या विकासासाठीच केला.’’
यावेळी पक्षाचे तालुकाध्यक्ष विष्णू काका हिंगे, भीमाशंकर कारखान्याचे अध्यक्ष बाळासाहेब बेंडे, शिवाजीराव लोंढे, बारकू बेनके, किसन लोखंडे, मनोहर शेळके, अजय आवटे, रमेश खिलारी, सुषमा शिंदे, दादाभाऊ पोखरकर, रवींद्र करंजखेले, सुनील बाणखेले, शिवाजी राजगुरू, सचिन भोर, नितीन वाव्हळ आदी उपस्थित होते.
सूत्रसंचालन नीलेश पडवळ व अनिल वाजे यांनी केले.