शिंगवे येथे चक्क उसाची चोरी

निरगुडसर, ता. २२ : घरातून सोने-नाण्याची चोरी होते, पण शेतामधून चक्क ऊस चोरीला गेल्याची घटना शिंगवे (ता. आंबेगाव) येथील गाढवेवस्तीवर घडली आहे, मनीषा गाढवे यांच्या शेतातून अंदाजे एक टन उसाची चोरी झाल्याची घटना सोमवार (ता. २१) रोजी उघडकीस आली आहे.
शिंगवे गावाच्या उत्तरेला गाढवेवस्ती असून, याठिकाणी मनीषा रवींद्र गाढवे यांची ऊसशेती आहे. हे कुटुंब नोकरीनिमित्त वारूळवाडी-नारायणगाव (ता. जुन्नर) येथे राहते. मनीषा गाढवे या येऊन-जाऊन शेती व्यवसाय पाहतात. त्यांनी अडीच एकर क्षेत्रात उसाचे पीक घेतले आहे. या परिसरात चार-पाच दिवसांपासून पाऊस पडत असल्यामुळे गाढवे यांना शेताकडे जायला जमले नाही. सोमवारी पाऊस उघडल्यानंतर त्यांनी उसाच्या शेतात जाऊन पाहणी केली असता एक सरी ऊस तोडून नेल्याचे आढळून आले. अंदाजे एक टन ऊस अज्ञाताने चोरून नेल्याचे गाढवे यांनी सांगितले.

मनिषा गाढवे म्हणाल्या, ‘‘शिंगवे येथे गाढवे मळ्यात मी अडीच एकर शेतात ऊस पिकवला आहे. मी नारायणगाववरून ये-जा करून शेती करत असताना खूप अडचणी येतात. या भागात बिबट्याची मोठी भीती आहे. विजेमुळे रात्री-अपरात्री उसाला पाणी द्यावे लागते. यापूर्वी किरकोळ घटना घडल्या होत्या; परंतु पावसामुळे शेताकडे यायला जमले नाही. त्या काळात शेतातून जवळपास एक टन ऊस चोरीची घटना पहिल्यांदा घडली आहे. याबाबत पारगाव कारखाना पोलिस ठाण्यात तक्रार दिली आहे. पारगाव पोलिसांनी प्रत्यक्ष शेतात जाऊन पाहणी केली आहे.’’

शिंगवे (ता. आंबेगाव) : मनीषा गाढवे यांच्या शेतातून झालेली उसाची चोरी.