बिबट्याचा हल्ल्यात शेतकरी गंभीर जखमी

निरगुडसर, ता.१० : शेतातील गवार पाहण्यासाठी घरापासून अवघ्या २०० फूट अंतरावर गेलेल्या शेतकऱ्यावर उसात दबा धरून बसलेल्या बिबट्याने हल्ला केला व गंभीर स्वरूपात जखमी केले आहे. यामध्ये शेतकरी गणेश सयाजी वाबळे (वय ५५) यांच्या डोक्यावर खोलवर जखम झाली आहे, तसेच कान, मान, गालावरही जखमा झाल्या आहेत. खडकी येथील पांढरीवस्ती (ता. आंबेगाव) येथे ही घटना गुरुवारी (ता.१०) सकाळी पावणेसात वाजण्याच्या सुमारास घडली.
जखमी झालेल्या शेतकऱ्यास तातडीने उपचारास मंचर उपजिल्हा रुग्णालयात दाखल करण्यात आले. खडकी गावापासून काही अंतरावर पांढरीवस्ती असून, येथील काळूबाई मंदिरानजीक शेतकरी गणेश सयाजी वाबळे हे शेतकरी आपल्या कुटुंबासमवेत राहतात. परिसरात वस्तीदेखील असून, उसाचे क्षेत्र जास्त आहे. वाबळे हे सकाळी घरापासून जवळच असलेल्या गवारीच्या शेताची पाहणी करण्यासाठी गेले होते. त्यावेळी दबा धरून बसलेल्या बिबट्याने हल्ला केला. यामध्ये वाबळे यांनी आरडाओरड करत स्वतःला सावरत पळाल्याने बिबट्याने उसात धूम ठोकली.
या वेळी महेंद्र भोर, चंद्रकांत भोर, दीपक बांगर यांनी तातडीने वाबळे यांना ग्रामीण रुग्णालयात दाखल केले. या वेळी माजी सहकारमंत्री दिलीप वळसे पाटील यांचे स्वीय सहाय्यक रामदास वळसे यांनी ग्रामीण रुग्णालयात तातडीने येऊन वाबळे यांची भेट घेतली. वनपरिक्षेत्र अधिकारी विकास भोसले,वनपाल सोनल भालेराव, वनपाल प्रदीप औटी, जयसिंग थोरात यांनीही रुग्णालय येऊन जखमी शेतकऱ्याची विचारपूस करत घटनास्थळी येऊन पाहणी केली. यावेळी रुग्णालयात राष्ट्रवादी काँग्रेस शरदचंद्र पवार पक्षाचे जिल्हा कार्याध्यक्ष देवदत्त निकम, तालुका युवक अध्यक्ष विशाल वाबळे यांनीही जखमी शेतकऱ्याची रुग्णालयात येऊन भेट घेतली.