नागापूर परिसरात बंद घरांतून चोरी

निरगुडसर, ता. ९ : नागापूर (ता. आंबेगाव) येथे बंद असलेली तीन घरे चोरट्यांनी फोडून रोख तीन हजार रुपये, चांदीची साखळी, तांब्याची भांडी लंपास केली. ही घटना शुक्रवार (ता. ८) सकाळी उघडकीस आली.
अष्टविनायक महामार्गावर नागापूर गाव आहे. गावाजवळ श्रीक्षेत्र थापलिंग देवस्थानाच्या अलीकडे भोरमळा आहे. येथील तानाजी नामदेव भोर यांचे कुटुंब मंचर येथे राहतात. त्याचा गैरफायदा घेत चोरट्यांनी त्यांच्या घराच्या लोखंडी दरवाजाची कडी तोडली आणि मुख्य दरवाजाचीदेखील कडी तोडून घरात प्रवेश केला. घरातील साहित्याची उचकापाचक करून घरातील चांदीची साखळी, चार पितळी समया, देवाची तांब्याची भांडी लंपास केली. त्यानंतर चोरट्यांनी शेजारीच असलेल्या पांडुरंग विठोबा भोर यांच्या घराची कडी तोडली. पांडुरंग भोर हे येथून जवळच असलेल्या जवळे गावातील त्यांच्या मुलीच्या दररोज घरी झोपायला जात असतात. चोरट्यांनी त्यांच्या घरातील कपाटे व इतर वस्तूंची उचकापाचक केली. त्यानंतर चोरट्यांनी शेजारीच असलेल्या मारुती पांडुरंग भोर यांचेदेखील घर फोडले. मारुती भोर हे मुंबई येथे वास्तव्यास असतात. घरातील कपाटातील रोख तीन हजार रुपये चोरट्यांनी लंपास केले व घरातील साहित्य वस्तूंची उचकापाचक केली.
शुक्रवारी सकाळी पारगाव कारखाना पोलिस ठाण्याच्या पोलिसांनी नागापूर येथे भेट दिली. या परिसरात भुरट्या चोऱ्या वाढल्या आहेत. नुकत्याच चांडोली कार फाटा, जाधववाडी, रांजणी, वळती, शिंगवे या गावांमध्ये चोरीच्या घटना घडलेल्या आहेत. पारगाव कारखाना आणि मंचर पोलिसांनी रात्रीच्या वेळी या भागात गस्त वाढवावी, अशी मागणी नागरिकांनी केली आहे.