दशक्रिया विधी घाटावरच जवळे येथे मृत्यू प्रमाणपत्र

निरगुडसर, ता. २२ ः जवळे (ता. आंबेगाव) ग्रामपंचायतीने एक नावीन्यपूर्ण उपक्रम राबवला आहे. मृत व्यक्तीचा दाखल्यासाठी हेलपाटे तर सोडाच, पण ग्रामपंचायतीच्या पायऱ्या देखील चढण्याची गरज नाही. कारण तो दाखला दशक्रिया विधीच्या घाटावरच कुटुंबीयांना देण्याचा उपक्रम ग्रामपंचायतीने सुरू केला आहे. जवळे ग्रामपंचायत विविध नावीन्यपूर्ण उपक्रम राबविण्यात अग्रेसर आहे. ग्रामपंचायतीने मुख्यमंत्री समृद्ध पंचायत राज अभियानाच्या अनुषंगाने अभिनव उपक्रम राबविला आहे. सरपंच वृषाली उत्तम शिंदे पाटील, उपसरपंच मनीषा टाव्हरे, सर्व ग्रामपंचायत सदस्य, ग्रामपंचायत अधिकारी शीला साबळे या सर्वांच्या निर्णयानुसार हा उपक्रम राबविण्यात येत आहे. स्वर्गीय केरभाऊ नामदेव टाव्हरे व सखूबाई सहादू बरकडे यांचे मृत्यू प्रमाणपत्र हे दशक्रिया विधी संपन्न झाल्यानंतर त्याच ठिकाणी त्यांच्या कुटुंबीयांना दिल्याची माहिती ग्रामपंचायत सदस्य हरिचंद्र शिंदे व दत्तात्रेय लायगुडे यांनी दिली.