गिरवी बंधाऱ्याच्या दुरुस्तीसाठी अन्नत्याग आंदोलन

नीरा नरसिंहपूर, ता. २० : नीरा नदीवरील गिरवी (ता. इंदापूर) व गणेशगाव (ता. माळशिरस, जि. सोलापूर) येथील कोल्हापूर पद्धतीचा बंधारा सन २०२२ पासून तीन वेळच्या पुरामध्ये वाहून गेला असताना बंधाऱ्याचे काम आजतागायत केलेले नाही. काम तातडीने सुरू करावे, यासाठी सोलापूर जिल्हा युवा सेना जिल्हाप्रमुख गणेश इंगळे व माळशिरस तालुका मराठा सेवक आशुभाऊ ढवळे यांनी बंधाऱ्यावर गुरुवारपासून (ता. १९) अन्नत्याग आंदोलन चालू केले आहे.
नीरा नदीवरील गिरवी व गणेशगाव येथील कोल्हापूर पद्धतीचा बंधाऱ्याचा गिरवी बाजूकडील भराव सन २०२२ पासून मे २०२५ पर्यंत तिसऱ्यांदा पुराच्या पाण्याने वाहून गेला आहे. यासंदर्भात युवा सेनेच्या वतीने बंधाऱ्यावरती हालगी नाद, जल समाधी आंदोलन, पाटबंधारे खात्याच्या विरोधात मुंडण आंदोलन अशी अनेक प्रकारची आंदोलने केली आहेत. तेव्हाच पाटबंधारे खात्याने बंधाऱ्याचे दुरुस्तीचे टेंडर काढले. ई निविदेची तारीख २० मार्च २०२५ ते ३ एप्रिल २०२५ ठेवली. तसेच, ई निविदा ७ एप्रिल रोजी उघडण्याची तारीख ठेवली होती. त्यानंतर ई निविदा उघडूनही दीड महिना झाला. तरीसुद्धा बंधाऱ्याचे काम अद्यापही चालू झालेले नाही. सदरचे काम तत्काळ चालू करावे, या मागणीसाठी गणेश इंगळे व आशुभाऊ ढवळे यांनी नीरा नदीच्या बंधाऱ्यावर अन्नत्याग आंदोलन चालू केलेले आहे. जोपर्यंत बंधाऱ्याचे काम चालू होत नाही, तोपर्यंत अन्नत्याग चालूच ठेवणार असल्याचे त्यांनी सांगितले.
या आंदोलनात नजीर शेख, दादासाहेब नलवडे, पोपट रुपनवर, पोलिस पाटील भाईसाब शेख, मनोहर यादव, अप्पासाहेब महाडीक, अप्पासाहेब शेंडगे, माऊली मदने, गणेश यादव,अमीर कोरबू, बालम कोरबू, सागर मोरे, ओंकार पाटील, हारून कोरबू, शब्बीर शेख, विजय यादव, सैफुल शेख, गणेश जाधव, हुमाईन शेख, अमीर शेख, सागर मोहिते, नसीर शेख आदींसह गिरवी, गणेशगाव, संगम येथील ग्रामस्थ सहभागी झाले आहेत.
दरम्यान पाटबंधारे विभागाचे अधिकारी जडे व इनामदार यांनी शुक्रवारी आंदोलनकर्त्यांना भेटून नदीला पाणी वाहत असल्याने काम करण्यास अडचण येत असून, पावसाळ्यानंतर कामास सुरवात करू, असे सांगत आंदोलन मागे घेण्याची विनंती केली. सदर दुरुस्ती कामास एक कोटीचा निधी मंजूर झाला असून भराव न करता भिंत बांधण्यात येणार आहे.