पिंपळगाव जोगा परिसराला अवकाळी पावसाने झोडपले

ओतूर, ता. १३ : पिंपळगाव जोगा (ता. जुन्नर) परिसराला रविवारी दुपारी ४ वाजण्याच्या सुमारास जोरदार वादळी वाऱ्यासह अवकाळी पावसाने झोडपले. यामध्ये अहिल्यानगर-कल्याण महामार्गावर दोन ठिकाणी झाडे कोसळली. त्यामुळे काही काळ वाहतूक विस्कळीत झाली. तर अनेक शेतकऱ्यांच्या शेतातील पिकांचे मोठे नुकसान झाले.
ओतूर, उदापूर, डिंगोरे, पिंपळगाव जोगा, कोळवाडी, मढ परिसरात सकाळपासून ढगाळ हवामान होते. उकाड्याने नागरिक हैराण झाले होते. अनेक शेतकऱ्यांची कांद्यांची काढणी चालू होती, तर काहींनी कांदे काढून शेतात अरणी केल्या होत्या. मात्र दुपारी ४ वाजता अचानक सोसाट्याच्या वाऱ्यासह अवकाळी पाऊस सुरु झाला. त्यामुळे अनेकांचा कांदा पावसात भिजला. तर अन्य पिकांनाही फटका बसला.
तर पिंपळगाव जोगा ते कोळवाडी गावच्या दरम्यान अहिल्यानगर-कल्याण महामार्गावर निलगिरीचे मोठे झाड उन्मळून पडले. तसेच पुढे वाटखळे गावच्या हद्दीतही महामार्गावर मोठे बाभळीचे झाड पडून इतर राडारोडा आला. त्यामुळे काही काळ वाहतूक विस्कळीत झाली होती. महामार्गावर वाहनाच्या लांबच लांब रांगा लागल्या होत्या.
याबाबतची माहिती ओतूर पोलिसांना मिळाल्यानंतर सहाय्यक पोलीस निरीक्षक एल. जी. थाटे यांच्या मार्गदर्शनाखाली पोलीस कर्मचारी शामसुंदर जायभाय, किशोर बर्डे, होमगार्ड शुभम काशिद, गोरक्षनाथ गवारी यांनी झाडे जेसीबीच्या सहाय्याने बाजूला केली. त्यानंतर वाहतूक सुरळीत झाली.
---