ओतूर, डिंगोरे येथे शेतीचे बांध फुटले

ओतूर,ता.२६ : ओतूर (ता.जुन्नर) परिसरातील गावात रविवारी दुपारी नंतर झालेल्या जोरदार अवकाळी पावसामुळे काढणीला आलेल्या भुईमूग, बाजरी, कोथिंबीर व इतर शेती पिकांचे मोठ्या प्रमाणात नुकसान होणार आहे. तसेच काही भागात शेतांच्या बांध फुटले आहेत तर काही भागात घराचे व झोपड्याचे पत्रे कौले उडाली तर भिंती ही पडल्या आहेत.
पिंपळगाव जोगा धरणावर सोमवारी (ता.२६) सकाळी सहा वाजेपर्यंत ५२ मिलिमीटर पावसाची नोंद झाली आहे. पिपळगाव जोगा धरणातून पुष्पावती नदीत १२०० क्युसेकने पाण्याचा विसर्ग सुरू आहे.
ओतूर शहरात सिमेंट रस्त्यावरून मोठ्या प्रमाणात पाणी वाहत होते. तर ओतूर बसस्थानक परिसरात मोठ्या प्रमाणात पावसाचे पाणी साचलेले असल्याने दुचाकी व चारचाकी वाहनांना या पाण्यातून मार्ग काढण्याताना कसरत करावी लागत होती.तसेच डिंगोरे गावच्या हद्दीत आंबेदरा मार्गावर रस्ताच्या कडेला शेताच्या बांधावर केलेली सिमेंट भिंत कोसळली. त्यामुळे वाहतूक विस्कळित झाली. आंबेदरा या आदिवासी ठाकर वाडीच्या हद्दीत बाजरी उत्पादक शेतकरी रवींद्र गंगाराम भले या शेतकऱ्यांची शेतात काढून (ऐटाळून)ठेवलेली बाजरीची कणसे भिजली. रवींद्र गंगाराम भले यांचे कौलारू झोपडी वजा घर जमीनदोस्त झाले आहे.

लाखो रुपयांच्या कोथिंबीर, मेथीची माती
ओतूर, उदापूर, डिंगोरे, पिंपळगाव जोगा, सितेवाडी, मढ, खिरेश्ववर,कोपरे,मांडवे, मुथाळणे या व इतर गावात या पावसामुळे उन्हाळी भुईमूग व बाजरीचे नुकसान झाले आहे. तसेच विक्रीसाठी आलेल्या लाखो रुपये किमतीच्या कोथिंबीर व मेथीची माती झाली आहे. टोमॅटो,मिरची,काकडी, फ्लॉवर यांच्या ही बागांचे मोठ्या प्रमाणात नुकसान झाले असून किडीचा प्रादुर्भाव मोठ्या प्रमाणात झाला आहे.

मुसळधार पावसामुळे आमचे कौलारू घर जमीनदोस्त झाले असून शेतात ऐटाळून ठेवलेली बाजरीची कणसे व सरमाड ही भिजून खराब झाले आहे.तरी सरकारने आर्थिक मदत करावी.
- रवींद्र गंगाराम भले

मुसळधार पावसामुळे पिंपळगाव जोगा डिंगोरे जिल्हा परिषद गटात शेती पिकांचे व शेत बांधायचे आणि आदिवासी भागातील काही कौलारू घर व गोठ्याचे ही नुकसान झाले आहे. तरी पीक पहाणी नोंदीची अट न घालता बाधित शेत पिकांचे सरसकट पंचनामे करावेत. टोमॅटो,मिरची,काकडी,फ्लॉवर,कोथिंबीर व इतर पिकांच्या नुकसानीसाठी एकरी आर्थिक मदत शासनाने जाहीर करावी.
- अंकुश आमले, माजी जिल्हा परिषद सदस्य

00234, 00235