तहसीलदार

ओतूर, ता. ३० : आंबेगव्हाण (ता. जुन्नर) व परिसरातील अवकाळी पावसाने नुकसान झालेल्या शेतीची व पिकांची पाहाणी जुन्नरचे तहसीलदार सुनील शेळके व तालुका कृषी अधिकारी गणेश भोसले यांनी केली असून पंचनाम्याच्या सुचना दिल्या आहेत.
यावेळी त्याबरोबर आंबेगव्हाणच्या सरपंच अनिता डोके, उपसरपंच राजेंद्र गायकर, तंटामुक्तचे संतोष मेंगाळ, विलास डोके, उपकृषी अधिकारी सुरेश घोलप, कृषी अधिकारी अविनाश खिगे, जालंदर गवांदे, दत्तात्रेय गवांदे, योगेश गवांदे, तन्मय घोलप, प्रकाश हिंगणे, रोहीत गवांदे हे व इतर शेतकरी उपस्थित होते. यावेळी उपस्थित शेतकऱ्यांनी शेती पिकांच्या व शेती बांधांच्या नुकसानीची माहिती तहसीलदार यांना दिली.
जुन्नर तालुक्यात गेल्या काही दिवसात सरासरी १८५ मिलिमीटर पाऊस झाला आहे. त्यामुळे आपल्या तालुक्यात येनेरे, तांबे, काळे, दातखिळवाडी या परिसरात तसेच आंबेगव्हाण, पालघर, ओतूर परिसरात बुधवारी काही ठिकाणी तहसीलदार सुनील शेळके आणि तालुका कृषी अधिकारी गणेश भोसले यांनी शेतामध्ये जाऊन पाहणी केली. त्यामध्ये कृषी विभागाने दिलेल्या प्राथमिक माहितीनुसार जवळपास ७० हेक्टर पेक्षा जास्त शेतजमीन या आवकाळी पाऊसाने बाधित झाली आहे. यामध्ये आंबा, कांदा, टोमॅटो, केळी, भाजीपाला बरोबर काही ठिकाणी उन्हाळी बाजरी आणि भुईमूग यांचे मोठ्या प्रमाणावर नुकसान झाले आहे.त्यामुळे शासन आदेशा प्रमाणे महसूल, ग्रामविकास आणि कृषी या तीनही विभागातील क्षेत्रीय अधिकारी याना तत्काळ पंचनामे करावयाच्या सुचना देण्यात आल्या असल्याची माहिती तहसीलदार सुनील शेळके यांनी दिली.

00251