ओतूरला बसस्थानकाला डबक्याचे स्वरूप

ओतूर, ता. १० ः ओतूर (ता. जुन्नर) येथील बसस्थानकाला पावसाच्या पाण्यामुळे डबक्याचे स्वरूप आले आहे. तसेच ओतूर बसस्थानक ते ब्राम्हणवाडा चौक या मार्गावर मोठ्या प्रमाणात खड्डे पडून त्यामध्ये पाणी साचले आहे.
शहरातील बसस्थानकातून प्रवेश करताना नागरिकांना मुख्य रस्त्याची झालेली दुरवस्था व पावसाच्या पाण्याने साचलेली डबकी यामुळे मोठ्या त्रासाला सामोरे जावे लागत आहे. ओतूर ही मोठी बाजारपेठेत असल्यामुळे परिसरातील गावांमधून नागरिक विविध कामांसाठी आणि खरेदी करण्यासाठी येथे येत असतात. मात्र, रस्त्यावरील खड्ड्यांमुळे व पावसाच्या पाण्यामुळे सर्वत्र चिखल झाला आहे. त्यामुळे स्थानिक नागरिक, प्रवासी, दुकानदार, विद्यार्थी, ज्येष्ठ नागरिक यांना मोठ्या प्रमाणात समस्यांना तोंड द्यावे लागत आहे. त्यामुळे नागरिकांकडून महाराष्ट्र राज्य परिवहन खाते यांच्याविषयी तीव्र नाराजी व्यक्त केली जात आहे.महाराष्ट्र राज्य परिवहन खात्याने त्वरित याकडे लक्ष देऊन रस्त्याची डागडुजी करावी, अशी मागणी प्रवासी व नागरिक करीत आहे.
याबाबात सरपंच छाया तांबे व उपसरपंच प्रशांत डुंबरे यांच्याशी संपर्क साधला असता ते म्हणाले की, ‘‘अहिल्यानगर- कल्याण महामार्गावरील ओतूर बसस्थानकाच्या प्रवेशापासून ते ब्राह्मणवाडा चौक या मार्गासाठी ४० लाख रुपये निधी गेल्या वर्षीच मंजूर झालेला आहे. मात्र, महाराष्ट्र राज्य परिवहन महामंडळाच्या अखत्यारीत हा परिसर येत असल्याने त्या कामाला तांत्रिक अडचण येत होती. त्यासाठी ओतूर ग्रामपंचायत व गावातील सामाजिक व राजकीय क्षेत्रात काम करणाऱ्या सर्वांनी पाठपुरावा करून या मार्गाचा प्रश्न मार्गी लावण्यासाठी प्रयत्न केला आहे. या मार्गाचे काम करण्यास शनिवारी परवानगी मिळाली आहे. तरी लवकरच या मार्गाचे काम सुरू होऊन येथे सिमेंट काँक्रिटचा सुसज्ज मार्ग होणार आहे. तसेच ग्रामपंचायत व महाराष्ट्र राज्य परिवहन खात्याच्या सहकार्याने येथे बंदिस्त गटार ही करण्यात येणार आहे.’’